Azərbaycanın Pekin olimpiadasına yollanacaq yunan-Roma güləşçilərinin adları açıqlanıb

26.05.2008 - 12:29

Bakı. Elşən Məmmədov - APA-Sport. Azərbaycanın yunan-Roma güləşi üzrə milli komandasının 2008-ci il Pekin Yay Olimpiya Oyunlarında çıxış edəcək heyəti müəyyənləşib. Bu haqda “APA-Sport” agentliyinə yığma komandanın baş məşqçisi Elçin Cəfərov məlumat verib. Onun sözlərinə görə, 27 – 29 mayda Bakıda keçiriləcək “Qızıl Qran-Pri” turnirinin final mərhələsində pəhləvanlarımızın göstərəcəyi nəticədən asılı olmayaraq, yığmamızın olimpiadaya 7 mümkün lisenziyadan 6-nı qazanan üzvləri Pekinə yollanacaqlar: “Bildiyiniz kimi, güləş növündə lisenziya onu qazanan idmançıya deyil, çəkiyə verilir. Amma biz 6 çəki dərəcəsində vəsiqələrə sahib çıxmış pəhləvanlarımızı olimpiadaya aparmaq qərarına gəlmişik. Bu gün 84 və 120 kq çəkilərdə Şalva Qadabadze və Anton Botevdən güclü pəhləvanımız yoxdur. 55, 60, 66 və 74 kq çəkilərin hər birində ən azı 4 idmançını sınaqdan çıxarmışıq. Həqiqətən də həmin kateqoriyalarda Rövşən Bayramov, Vitali Rəhimov, Fərid Mansurov və İlqar Abdulov liderdirlər. Əgər qarşıdakı təlim-məşq toplantıları və “Qızıl Qran-Pri” turnirinin finalında zədə, intizamsız, idman rejimini pozması səbəbindən heyətdən kənarlaşdırılan olmasa, Pekin olimpiadasında iştirak üçün nəzərdə tutulan heyətimizdə heç bir dəyişiklik baş verməyəcək”. Baş məşqçi bildirib ki, milli komanda 1 – 11 iyun və 1 – 14 iyulda Nabran istirahət zonasında, 12 – 22 iyun və iyulun 15-dən olimpiadaya yollananadək isə Tofiq Bəhramov adına Respublika stadionunda yerləşən təlim-məşq bazasında hazırlıq prosesi keçəcək. Pəhləvanlarımız Pekinə avqustun 8-də yola düşəcəklər. Olimpiadanın proqramına əsasən, 12 avqustda R.Bayramovla (55 kq) V.Rəhimov (66 kq), 13 avqustda F.Mansurovla (66 kq) İ.Abdulov (74 kq), 14 avqustda isə Ş.Qadabadze (84 kq) ilə A.Botev (120 kq) döşək üzərinə çıxacaqlar.
Qeyd edək ki, sərbəst güləş yığmamız bütün 7 mümkün çəki dərəcəsində lisenziyalara sahib çıxsa da, Pekin olimpiadasında çıxış edəcək heyət hələ açıqlanmayıb.