Bakı. Aqşin Əliyev - APA-Sport. İyunun 4-də Almaniyanın Sühl şəhərində stend atıcılığı üzrə Dünya Kuboku start götürəcək. “APA-Sport” agentliyinin məlumatına görə, yarışda Azərbaycanın şərəfini Zemfira Meftahəddinova və Emin Cəfərov qoruyacaqlar. Stend atıcılarımız baş məşqçi Hafiz Cəfərovun rəhbərliyi altında sabah səfərə çıxsalar da, yarışa qoşulmaq üçün 6 gün gözləməli olacaqlar. Dünya Kubokunun təqviminə əsasən, öncə trap (səngər) növündə mübarizə başlanacaq. Skeet növündə çıxış edən Sidney Yay Olimpiya Oyunlarının qalibi Z.Meftahəddinova isə iyunun 9-da mübarizəyə qoşulacaq. Ertəsi gün digər həmyerlimiz E.Cəfərov öz bacarığını nümayiş etdirəcək. H.Cəfərovun yetirmələri Sühldəki turnir yekunlaşdıqdan sonra vətənə qayıtmayaraq, Dünya Kubokunun növbəti mərhələsinə qatılmaq məqsədilə birbaşa Serbiyanın paytaxtı Belqrada yollanacaqlar. Belqraddakı yarış 14-23 iyun aralığında baş tutacaq. Dünya Kubokunun iki mərhələsi Z.Meftahəddinova üçün Pekin Olimpiadasına hazırlıq xarakteri daşıyacaq.

• Azərbaycan idmançıları Gimnaziada üçün yola düşdü
• Azərbaycanda Beynəlxalq Xizək Alpinizmi Federasiyasının Plenar Assambleyası keçirilib - FOTO
• AKAF prezidenti və Çad Olimpiya Komitəsinin baş katibi arasında görüş keçirilib
• BOK rəsmisi Bakıya gələcək
• Əməkdar məşqçi vəfat edib