Bakı. Aqşin Əliyev - APA-Sport. Ağır atletika üzrə Azərbaycan milli komandası Lənkəranda təlim-məşq toplanışı keçəcək. Bu haqda “APA-Sport” agentliyinə məlumat verən yığmanın baş məşqçisi Vahid Nəzərovun sözlərinə görə, hazırlıq prosesinin iyunun son ongünlüyündə keçirilməsi nəzərdə tutulub. Atletlər hazırda Milli Aviasiya Akademiyasının zalında gündə iki dəfə məşq edirlər. 13 idmançının iştirakı ilə keçən məşqlərdə əsas diqqət Pekin Olimpiadasına hazırlığa yönəldilib. V.Nəzərov bildirib ki, Yay Olimpiya Oyunlarına aparılacaq tam heyət iyunun 25-dək məlum olacaq: “Yığma üzvləri üçün axırıncı sınağı 22-25 iyun aralığında keçirəcəyik. Bu zaman fərqlənən atletlər olimpiadada iştirak hüququ qazanacaqlar. Ola bilsin ki, hansısa idmançı məşq edərkən normativi yerinə yetirib, əsas heyətdə yer alsın. Lənkərana tam heyət müəyyənləşdikdən sonra gedəcəyik. Çünki həmin vaxt məşq edənlərin sayı azalacaq, necə deyərlər, komanda bir qədər yüngülləşəcək”. Baş məşqçi təlim-məşq toplanışının iki həftə davam edəcəyini söyləyib.
Qeyd edək ki, olimpiadada ölkəmiz 5 atletlə təmsil olunacaq. Hələlik Nizami Paşayev və Əfqan Bayramovun Pekinə aparılacağı dəqiqləşib.

• Azərbaycan idmançıları Gimnaziada üçün yola düşdü
• Azərbaycanda Beynəlxalq Xizək Alpinizmi Federasiyasının Plenar Assambleyası keçirilib - FOTO
• AKAF prezidenti və Çad Olimpiya Komitəsinin baş katibi arasında görüş keçirilib
• BOK rəsmisi Bakıya gələcək
• Əməkdar məşqçi vəfat edib