Azərbaycan kanoeçisi Dünya Kubokunun mərhələ yarışında qızıl medal qazanıb

08.06.2008 - 13:13

Zeqed. Elşən Məmmədov – APA-Sport. Macarıstanın Zeqed şəhərində keçirilən kayak və kanoe qayıqlarında avarçəkmə üzrə Dünya Kubokunun I mərhələsinə yekun vurulub. “APA-Sport” agentliyinin məlumatına görə, Azərbaycan yığma komandası tarixində ilk dəfə qatıldıqları nüfuzlu yarışda bir qızıl medal qazanıb. Bu uğura kanoeçimiz Valentin Demyanenko nail olub. O, 200 metr məsafədə 40,901 saniyə nəticə ilə yerli idmançılar Lazio Foltan və Peter Balaz, latviyalılar Yevgeni Myasniankin və Yevgeni Suklin, çinli Gianq Li və Şao Kun Heanq, yunanıstanlı Andreas Kiliqkaridis və avstriyalı Torsten Laxmanı geridə qoyub. Bu nəticə ilə Azərbaycan 35 ölkənin mübarizə apardığı Dünya Kubokunun I mərhələsində Serbiya ilə birgə 8-9-cu yerləri bölüşdürüb. Bununla yanaşı, ölkəmiz postsovet respublikaları arasında yalnız Litvadan geri qalıb. Ümumilikdə medal qazanan 16 ölkə arasında keçmiş SSRİ respublikalarından Litva və Azərbaycandan başqa Ukrayna da olub. Xal hesabında isə ölkəmiz 22-ci yeri tutub. İdmançılarımız 37 xalın 33-ünü avarçəkmənin kanoe, 4-ünü isə kayak növündə əldə ediblər.