Belarusda bədii gimnastika üzrə Avropa çempionatı start götürüb. Apasport.az saytının xəbərinə görə, paytaxt Minskdə təşkil olunan yarışların ilk günündə top və halqa ilə şəxsi hesabda çıxış edən Azərbaycan idmançıları ustalıqlarını nümayiş etdiriblər.

Topla hərəkətlərdə Aliyə Qarayeva 28,150 bal toplayaraq 5-ci yeri tutub. Azərbaycan yığmasının lideri halqa ilə 6-cı nəticəni (27,500) göstərib. Aliyə bazar günü keçiriləcək hər iki finala vəsiqə qazanıb. Zeynəb Cavadlı müvafiq olaraq 23 (25,275) və 26-cı (25,150) yerləri tutub.

Komanda birinciliyində Azərbaycan 106,075 balla 4-cü yeri tutur. Lalə Yusifova, Ayşə Mustafayeva, Mənsurə Bağıyeva, Aynur Cabbarlı, Səbinə Qaratova və Siyana Vasilyevadan ibarət yeniyetmələr qrupumuz da 4-cü yerdə qərarlaşıb. Beş iplə hərəkətlərdən sonra komandamızın aktivində 24,900 bal var.

Bu gün gürz və lentlə şəxsi hesabda çıxış edən idmançılar meydana çıxacaq, bundan sonra isə komanda turnirində mükafatçılar müəyyənləşəcək. Yuniorlar isə yenidən beş iplə xalı üzərinə çıxacaqlar.

• “Azərbaycan Qolf Federasiyası” İctimai Birliyinin yığıncağı keçirilib
• Velosipedçilərimiz beynəlxalq “Tour of Mersin” yarışına qatılıblar
• Azərbaycan çempionatının qalibləri müəyyənləşib
• Bakı şəhər kubokunun birinci mərhələsində finalçılar müəyyənləşib
• Qarabağ MechaHack 9030-dan Nümunəvi Missiya: Texnologiya Sərhəd Tanımır