Cüdo üzrə millimizin üzvü Şamil Tuncay yığma komandadan uzaqlaşdırılıb.
Buna onun Aslan Kotsoyevlə yaşadığı insident səbəb olub. Tərəflər arasında baş verən münaqişədən sonra Tuncay millinin düşərgəsindən kənarlaşdırılıb.
O, məsələ ilə bağlı Apasport.az saytına müraciət edib.
İdmançı bu qərarın haqsız olduğunu bildirib: "Ölkəni beynəlxalq yarışlarda layiqincə təmsil etməyimə (2025 – “Berlin Junior European Cup” – 1-ci yer, 2025 – “Berlin Junior European Cup” – 1-ci yer, 2025 – “Poznan Junior European Cup” – 2-ci yer, 2024 – “Graz Junior European Cup” – 1-ci yer, 2024 – “Malaga Junior European Cup2 – 3-cü yer, 2024 – “European Judo Championships” (Juniors), Tallinn – 3-cü yer, 2023 – “Goygol Cadet European Cup” – 3-cü yer) baxmayaraq, heç bir təqsirim olmadan milli komandadan uzaqlaşdırılmışam.
Belə ki, 31.07.2025-ci il tarixində Makedoniyaya yarışa gedərkən komandanın digər üzvü Aslan Kotsoyevlə yaranmış kiçik mübahisədə Kotsoyev mənə qarşı fiziki şiddət göstərib, güc tətbiq edib və hadisə hava limanının müşahidə kameralarında lentə alınıb. Bütün bu sübutlara rəğmən Cüdo Federasiyasının rəsmiləri Kotsoyev barəsində heç bir tədbir görmədən təqsirim olmadığı halda məni komandadan uzaqlaşdırmaq qərarına gəliblər”.
Tuncay həmin münaqişədən sonra federasiya tərəfindən təzyiqlərə məruz qaldığını söyləyib: “Federasiya rəsmiləri tərəfindən mənə dəfələrlə Aslan Kotsoyevin adının hallandırılmaması ilə bağlı təzyiqlər göstərilib.
Mənə qarşı qərəzli mövqe 22.06.2025-ci il tarixində Berlində keçirilən beynəlxalq yarışda Aslan Kotsoyevi məğlub etməyimdən sonra başlayıb. Bu qalibiyyət hətta baş məşqçi Rüstəm Alimlinin də xoşuna gəlməyib və həmin arenada mənə qarşı soyuq münasibət göstərib.
Olimpiya çempionu Zelim Kotsoyevin qardaşı olan Aslan Kotsoyevin mövqeyindən çıxış edən federasiya rəsmiləri məni komandadan uzaqlaşdıraraq Azərbaycan adından yarışlarda iştirak etmək hüququmu əlimdən almaqla hansı maraqlara xidmət etdiklərini açıq-aşkar sübut etmiş oldular”.
O, daha öncə də belə halların yaşandığını bildirib: “Əlavə etmək istəyirəm ki, federasiyada daha öncə də iki idmançı arasında ciddi insident yaşanıb və hər ikisi barəsində 3 ay komandadan uzaqlaşma qərarı qəbul edilib. Amma hazırda hər ikisi komandanın üzvü kimi yarışlarda iştirak edirlər. Xüsusi vurğulamaq istəyirəm ki, o idmançılardan biri federasiya prezidentinin müşaviri Natiq Bağırovun şagirdi olduğuna görə həmin hadisəni ört-basdır ediblər.
Elə bu hadisə də sübutdur ki, federasiya yaranmış vəziyyətləri obyektiv dəyərləndirmir və “hansısa” maraqlara xidmət edir. Çox güman ki, baş verən hadisələr barədə federasiya prezidentinə həqiqətlər təhrif edilmiş şəkildə məruzə edilir.
Mənə qarşı edilmiş haqsızlığın araşdırılmasını, ədalətin bərqərar olunmasını tələb edirəm. Əslində, bu mövzu barədə yazılı şəkildə ölkə başçısına da müraciət edəcəm".
Apasport.az saytı olaraq məsələ ilə bağlı Cüdo Federasiyasının mövqeyini öyrənmək istəsək də, qurumun mətbuat katibi Ülkər Abbasova sorğumuza və zənglərimizə cavab vermədi.
Mətbuat xidməti zəngimizi açmadığı üçün adıçəkilən idmançı Aslan Kotsoyev və məşqçi Rüstəm Alimlinin fikirlərini ala bilmədik. Buna baxmayaraq, əgər əlaqə saxlanılarsa, Cüdo Federasiyasının bu mövzuda mövqeyini işıqlandırmağa hazırıq.
Oxşar xəbərlər
Ana səhifə
Bütün xəbərlər