"Qarabağ" Misli Premyer Liqasının 4-cü turunda "Turan Tovuz"a 1:0 hesabı ilə məğlub olub.

Apasport.az xəbər verir ki, Ağdam təmsilçisinin baş məşqçisi Qurban Qurbanov oyundan sonra keçirilən mətbuat konfransında fikirlərini bildirib:

- Çempionata hazır olmaq baxımından bizim üçün çox vacib oyun oldu. Bu gün qarşımızda yaxşı müdafiə olunan, vuruşan kollektiv var idi. Kurban Berdıyev müdafiəni qurmaqda çox tanınmış mütəxəssislərdən biridir. Həmçinin əks-hücumları yaxşı qurur. Bunu bilirdik. Amma nə qədər də olsa, "Turan Tovuz"u yaxından tanımırdıq. İstər-istəməz bizim fikrimiz daha çox Çempionlar Liqasında idi. Buna baxmayaraq, rəqib qalib gəlibsə, borcluyuq təbrik etməyə. İstəkləri və oyun nizam-intizamı ilə qalibiyyətə layiq idilər. Tovuzda həmişə futbola maraq olub. Bu gün də gördük ki, tribunada Tovuzdan gəlmiş nə qədər azarkeş var idi. Mövsümboyu qarşımızda yaxşı rəqib olacaq. Öz azarkeşlərimizə təşəkkür edirəm, sona qədər bizimlə oldular.

- İlk penaltidən öncə hakimə etiraz etdiniz. Bu, hansı epizodla bağlı idi?

- Ofsayd epizoduna. Sonra dedilər ki, çox cüzi ofsayd var idi. Mənim gördüyümə görə yox idi. Hakimə dedim ki, ofsayd varsa, oyunu hücum bitəndən sonra saxla.

- "Dinamo" ilə matçın bu oyuna təsiri oldu?

- Ümumiyyətlə Avropada oynadığımız bütün matçların təsiri var. Fərqli heyət oynayır, bəzi rotasiyalar edirik. Mən bu müddətdə həmişə məşqlərdən gileylənmişəm. 3-4 gündən bir iki heyət oynayanda futbolçuların hamısı bir yerdə məşq edə bilmir. Məşqin dinamikası, keyfiyyəti pozulur. Amma neçə illərdir biz belə davam edirik. Əvvəlki iki oyunda hiss olunmadısa, bu gün hiss olundu. Belə sıx qrafikdə futbolçuların hamısının sağlam olması vacibdir. Bizə qarşı çox ciddi hazırlaşan rəqiblər olur. Bu da normaldır. Mövsümün əvvəlidir. Belə məğlubiyyətlərin mənə, komandaya faydası çox olur.

- Yeni qapıçının performansını necə dəyərləndirirsiz?

- Normal. Lazım olan epizodlarda düzgün qərar verdi.

- Demək olar ki, gələcəkdə çox şans qazanacaq?

- Öz əlindədir. Daha yaxşı davam etsə, biz "yox" deməyəcəyik.

• Vüsal İsgəndərli Azərbaycana qayıtmaq istəmir
• Millimizin üzvü Ekstraklasanın rəmzi komandasına düşüb
• Rəşad Sadıqov bu futbolçunu "gözdən çıxarıb"
• De Bleker bu dəfə hakimləri "ayağa vermədi"
• Elxan Abdullayev: "Bura elə-belə gəlməmişik"