"Yaxşı oyunlarımızdan birini keçirdik. Artıq şərh etmək üçün adam söz tapmağa çətinlik çəkir. Növbəti asan qolumuzu buraxdıq. Buna baxmayaraq, futbolçular yaxşı reaksiya verdilər və böyük istəklə irəli atıldıq. Oyunun gedişatını dəyişdik, qol vurduq, penalti qazandıq, qol epizodlarımız oldu. Hücumlarımız ikinci yarıda da davam etdi. Sonlara yaxın "Qəbələ" bir anlıq müdafiədə buraxdığımız səhvdən istifadə etdi. Hesabı bərabərləşdirdilər. Dirəkdən dönən topumuz da oldu. Qələbə qazanmaq da istəyirdik. Amma oyun bərabərə bitdi. Komandamın oyunundan çox razıyam, inkişaf göz qabağındadır. Son 3 turdur ki, qış toplanışında komandadan nə tələb edirdiksə, nələr üzərində işləyirdiksə, onları görürəm. Bu isə məni sevindirir. Yeganə çatışmazlıq qol epizodlardan istifadə edə bilməməyimizdir. Bir də buraxdığımız kobud səhvlərin qarşısını almalıyıq.  Ondan sonra nəticələr daha sabit və daha yaxşı olacaq".

Apasport.az-ın məlumatına görə, bunu "Zirə"nin baş məşqçisi Rəşad Sadıqov deyib. O, Premyer Liqanın XXI turu çərçivəsində "Qəbələ" ilə 2:2 hesabı ilə başa çatmış oyundan sonra keçirilən mətbuat konfransına gec gəlib. İlk sual da bununla bağlı olub.

– Mətbuat konfransına gec gəlməyiniz komandaya iradınızı bildirməyinizlə əlaqədar idi?
– Xeyr, "CBC Sport"a matçla bağlı danışırdım. Futbolçularıma isə irad bildirmədim, bu cür oyuna görə təbrik etdim. Belə oyuna görə irad bildirmək ədalətsizlik olardı. Mənə görə ilk növbədə komandanın oyunudur. Bəli, bəzi oyunlarda, bəzi məqamlarda, görürsən ki, oyun getmir və üstünlüyü nəticəyə verirsən. Amma komandam bu cür oyun nümayiş etdiribsə, buna ancaq sevinə bilərəm.

– Qış fasiləsindən sonra ən yaxşı oyununu oynayan "Zirə" daha hansı komponentləri gücləndirə bilər? "Zirə"də 2-ci Hamidu Keyta var?
– Hər bir komandada yaxşı futbolçuların sayı çox olur. Amma 1-2 futbolçu daha çox fərqlənir. Bu gün Keyta yaxşı oyunlarından birini keçirdi. Komponentlərə gəldikdə, bəzən çox tərifləmək istəmirsən, çünki futbolçulara zərəri ola bilər. Həmçinin özümüzə də. Son fazalardakı ötürmələrdə və zərbələrdə artırmalıyıq. Həm "Neftçi", həm "Qəbələ" görüşlərində qalib gələrək daha iddialı duruma gələ bilərdik. Oyun planında hər 2 rəqibdən daha yaxşı oynadıq, amma bunu nəticəyə çevirə bilmədik. Əsas problem son fazalardadır. Vurulan qolda da sanki top qapıya girmək istəmir. Belə epizodlarımız çoxdur. Penaltini də qaçırdıq. Yolumuza davam edəcəyik. Buna hazıram. "Zirə"dəki məşqçiliyim zamanı qırılma hadisələri çox olur. Oyunlarda daha çox qalib gəlib, daha çox qol vura bilərik. Amma baxırsan ki, çox asan qol buraxırıq, min əziyyətlə qol vururuq. Belə olan halda, səbir etmək lazımdır. Yadımdadır ki, "Qarabağ"da da ilk illərdə belə hadisələr çox olurdu. Əsas rəqiblərimizdən daha yaxşı oynayırdıq, amma qələbə qazana bilmirdik. Bunu da özüm üçün həmişə xatırlayıram. Ümumiyyətlə, Qurban Qurbanovun məşqçiliyi mənim üçün kitabdır. Çətin məqamlar olduqda səhifələyirəm, baxıram. O məqamlarda necə davranıb, necə edib, daim çalışıram ki, nümunə götürüm. Bəlkə də məşqçi karyeram da Qurban Qurbanovun karyerasına bənzəyəcək. Elə olurdu ki, Çempionlar Liqasının qrupuna düşməliydik, düşə bilmirdik, Avropa Liqasının qrupuna düşməliyik, düşə bilmirdik. Oyunu hamıdan yaxşı oynayıb, qalib gələ bilmirdik. Çempionatda da çempion olmalıyıq, 2-ci olurduq. Son 2-3 tur onu göstərir ki, komanda düzgün yoldadır. Sadəcə oyun fəlsəfəmizi, üslubumuzu inkişaf etdirmək, möhkəmləndirmək lazımdır. Yeni oyunçular da komandaya qoşulduqdan sonra daha da yaxşı olacaq.

– "Neftçi" ilə oyunda Vild-Donald Qeryenin epizodu ilə bağlı danışarkən, demişdiniz ki, başa düşmədim, yəqin izahatı veriləcək. Bu oyunda necə, elə epizod oldu?
– Bu oyunda elə epizod olmadı. 2-ci hissədə Fares Abu Akelin epizodunda 2-ci sarı vərəqə ola bilərdi, ola bilməzdi, sual idi. Hakimlər oyunu yaxşı idarə etdilər. Ötən oyunla bağlı isə, biz haqlı çıxdıq ki, VAR çağırmamalıydı. Özümüzə də sual açıq qalmışdı. Futboldur da, hakimlər də səhv edəcək, həmçinin VAR da. Biz də səhv edirik, həmçinin futbolçular da. İstəyərdik ki, həlledici məqamdakı səhvlər daha az olsun.

– Hacıağa Hacılını 46-cı dəqiqədə niyə əvəzlədiniz? Narazılığınız var idi?
– Hacıağa elə futbolçudur ki... Özünü də, xəbərdar edirəm ki, 1 sarı vərəqə aldıqdan sonra səni dəyişəcəyəm, saxlamayacağam meydanda. Əgər ilk hissənin əvvəlində Hacıağa sarı vərəqə alırsa, bu, təhlükədir. Hamımız onun xasiyyətini, mübarizliyini, aqressivliyini bilirik. Amma əslində dəyişikliyi ona görə etmədik. İlk yarıda üstünlük bizim tərəfdə idi. Oyunumuz da alınırdı. 1 müdafiəyəmeyilli yarımmüdafiəçini hücumameyilli oyunçu ilə dəyişib, üstünlüyümüzü artırmaq istədim. Elə də oldu. Hücumlarımız daha sürətli alınmağa başladı. Fərqləndik də. Təəssüf ki, qələbə ilə başa çatmadı. Futbolçularımın əziyyətinə heyfsilənirəm. "Qəbələ" də yaxşı mübarizə apardı. Elmar Baxşıyev mübariz, yaxşı komanda formalaşdırıb.

– Təmkin Xəlilzadənin komandadan göndərilməsi nə ilə bağlı idi? Eşitdiyimizə görə, futboldankənar bəzi hərəkətləri var idi...
– Futboldankənar deyildi. Futbolla bağlı məsələ idi. Həmin məsələ də oldu-keçdi. Ona gələcək karyerasında uğurlar arzulayıram. Normal şəkildə yollarımızı ayırmışıq. Düşündüm ki, onun üçün də, bizim üçün də belə faydalı olar.

• Estoniya millisinin baş məşqçisi: "Azərbaycan millisi başqa qrupda olsaydı, fərqli nəticə ola bilərdi"
• "Şamaxı" I Liqa klubu ilə yoxlama oyunu keçirəcək
• Mahir Şükürov: "Bu biabırçılığa son vermək lazımdır" - Müsahibə
• PFL rəsmisi “İnter” - “Leyptsiq” matçına təyinat alıb
• “Sky sports”un tanınmış şərhçisi Bakıya gəlir