Ümummilli lider Heydər Əliyevin anadan olmasının 101-ci ildönümünə həsr edilən avarçəkmə üzrə "Prezident Kuboku-2024” beynəlxalq reqatasının ikinci günündə yarışlar
Mingəçevirdə “Kür” Olimpiya Tədris-İdman Mərkəzində keçirilib. Komandalar 500, 1000 və 1500 metr məsafəyə kayak, kanoe və akademik avarçəkmə növündə mübarizə aparıblar.
Apasport.az xəbər verir ki, milli komandamız günü üç medalla başa vuraraq daha bir uğura imza atıb. Təmsilçilərimizdən Əlimurad Hacızadə
2008-2009-cu il təvəllüdlü idmançıların mübarizəsində birnəfərlik kayak qayığı ilə 500 metr məsafəyə yarışlarda bütün rəqiblərini geridə qoyaraq Azərbaycan komandasına "Prezident Kuboku-2024” beynəlxalq reqatasının ilk qızıl medalını qazandırıb.
Akademik avarçəkmə növündə 2006-2007-ci il təvəllüdlü idmançıların mübarizəsində isə 1500 metr məsafəyə yarışda təmsilçimiz Nurlan Paşayev yarışı ikinci tamamlayaraq gümüş medala layiq görülüb.
Günün son medalını isə komandamıza Vacib Babayev və Qiyas Əhmədov cütlüyü qazandırıb. Təmsilçilərimiz akademik avarçəkmə üzrə 2008-2009-cu il təvəllüdlü idmançıların mübarizəsində 500 metr məsafəyə yürüşdə finiş xəttini üçüncü tamamlayaraq bürünc medal əldə ediblər.
Xatırladaq ki, mayın 3-də Mingəçevirdə “Prezident Kuboku-2024” beynəlxalq reqatasının bağlanış mərasimi olacaq. Bağlanış mərasimində əvvəlcə qaliblər mükafatlandırılacaq. Kayak, kanoe və akademik avarçəkmə üzrə kuboklar sahiblərinə təqdim ediləcək.
Daha sonra bağlanış mərasimi bədii hissə ilə davam edəcək. Müxtəlif musiqi nömrələri ilə yanaşı son illərin ən populyar ifaçılarından Hiss solo ifası ilə bağlanış mərasiminə rəng qatacaq. Reqataya möhtəşəm atəşfəşanlıqla yekun vurulacaq.
Oxşar xəbərlər
Ana səhifə
Bütün xəbərlər
Hesabım