Bakı Cüdo Mərkəzi "SAFE COMBAT Label" sertifikatına layiq görülüb. Bununla da Azərbaycan klubu döyüş növlərində iştirakçıların təhlükəsizliyinin və müdafiəsinin təmin edilməsinə yönəlmiş beynəlxalq proqram çərçivəsində tanınan cüdo klubları sırasına daxil olub.

Apasport.az xəbər verir ki, Avropa Cüdo İttifaqının (EJU) məlumatına görə, müxtəlif ölkələrdən 27 cüdo klubu "SAFE COMBAT" icmasına qoşulub. Bakı Cüdo Mərkəzi yayımlanan siyahıda yer alan yeganə Azərbaycan təşkilatıdır.

"SAFE COMBAT Label" sadəcə mükafat və ya xatirə nişanı deyil. Bu, döyüş növləri və döyüş sənətlərində təhlükəsizliyin təmin olunmasına yönəlmiş "SAFE COMBAT" – “SAFEguarding Code for COMBAT Sports and Martial Arts” layihəsi çərçivəsində hazırlanmış sertifikatlaşdırma və tanınma sistemidir.

Layihə “Erasmus+ Sport” proqramı çərçivəsində həyata keçirilir və döyüş növləri ilə döyüş sənətlərində təhlükəsizlik standartlarının yüksəldilməsinə yönəlib.

Sertifikat müvafiq qaydaları, prosedurları və praktiki mexanizmləri tətbiq edən klublara verilir. Bu tələblər idmançılar və idman prosesinin digər iştirakçıları üçün təhlükəsiz, qarşılıqlı hörmətə əsaslanan və sağlam mühitin yaradılmasını nəzərdə tutur.

Proqramda iştirakçıların zorakılıqdan, qəddar rəftardan, ayrı-seçkilikdən, laqeyd münasibətdən və digər yolverilməz davranış formalarından qorunmasına xüsusi diqqət yetirilir.

"SAFE COMBAT Label" sertifikatını alan klublar proqramın rəsmi nişanından öz informasiya və marketinq materiallarında istifadə etmək hüququ qazanırlar. Sertifikatlaşdırmadan keçmiş təşkilatlar "SAFE COMBAT" layihəsinin rəsmi internet səhifəsində də yerləşdirilir.

Bu, idmançılara, valideynlərə və himayəçilərə təhlükəsizlik, dürüstlük və iştirakçıların rifahı prinsiplərinə sadiqliyini praktiki olaraq təsdiqləmiş klubları müəyyənləşdirməyə imkan verir.

EJU-nun qeyd etdiyi kimi, sertifikatın mövcudluğu klubun idmançıların müdafiəsi prinsiplərini yalnız bəyan etmədiyini, həm də müvafiq standartları gündəlik fəaliyyətində tətbiq etdiyini göstərməlidir.

Azərbaycanla yanaşı, yayımlanan siyahıda Portuqaliya, Avstriya, Lüksemburq, Slovakiya, Serbiya və Yunanıstandan olan klublar da yer alıb. Braziliya və Yamaykadan olan təşkilatlar da sertifikat əldə ediblər.

• "Neftçi" heyətini yeni qapıçı ilə gücləndirib
• Üçqat Paralimpiya çempionu yeniyetmə və gənc paraüzgüçülərlə görüşüb
• Elmar Baxşıyev: "Ehtiyat qüvvədən maksimum istifadə etməyə çalışdıq"
• "Qarabağ"ın kapitanı: "Alonso taktiki cəhətdən “Qarabağ”dan üstün olmadı"
• "Sumqayıt”la oyunda qələbə qazanmaq üçün əlimizdən gələni edəcəyik"