Misli Premyer Liqasının VII turunun "Qarabağ" - "Neftçi" matçından (4:0) sonra ağdamlıların baş məşqçisi Qurban Qurbanovun mətbuat konfransı keçirilib.
"Dövlət suverenliyi münasibətilə xalqımızı təbrik edirəm. Bizim üçün əlamətdar gündür. Oyuna gəldikdə, vacib qələbə oldu. Çox yaxşı komandaya qarşı oynayırdıq. "Neftçi"nin son nəticələrinə baxdıqda, bilirdik ki, çox ciddi hazırlaşacaqlar. Bunu meydanda hiss etdik. İlk hissədə üç qol vursaq da, fasiləyə yaxın daha çox hücum edən tərəf idilər. İkinci yarıda riskə getdilər. Xeyli çətinliklər çəkdik. Nəticə çox vacib idi. Hər iki komandanın azarkeşlərinə təşəkkür edirəm ki, çox mədəni formada yaxşı azarkeşlik oldu. "Neftçi"yə və Roman Qriqorçuka uğurlar arzu edirəm".
- Qarşıda "Tottenhem"lə matç var. Bu oyunda o görüş üçün nəyisə sınaqdan keçirdiz?
- Fikrimiz var idi. Bəzi elementlərlə bağlı. Amma çox az alındı. Bu da oyunun gedişatına görə idi. Oyunun sonlarına yaxın daha çox alınmağa başladı.
- Ötən mövsüm "Qarabağ" daha həvəsli idi, bu mövsüm eyni tempdə gedir. Bu motivasiya "Tottenhem"ə qarşı yaxşı çıxış etmək üçün bəs edəcək?
- Oyundan əvvəl motivasiya veriləcək. Amma bu və oradakı oyunun tempi eyni olmayacaq. Rəqib məcbur edir ki, daha sürətli oynayaq. Bu və o oyunları yan-yana qoymaq olmaz. Əfsuslar olsun ki, tez-tez ritm dəyişir. Ən vacib elementlərdən biri, rəqibin tempinə hazır olmaqdır.
- Ağdamda yeni "İmarət" stadionunun təməli atıldı. Bununla bağlı fikriniz necədir?
- Maraqlandım. Şəkillərə də baxdım. Layihədən əvvəlcədən də xəbərim var idi. Deyəsən, əvvəlcə daha böyük tutumlu nəzərdə tutulmuşdu. Sırf futbol stadionudur. Azarkeşlər meydançaya tam yaxındır. Tutum az görünə bilər, amma rayon bölgəsi üçün öz çempionatımızda problem olmayacaq. Avroliqa oyunları üçün böyük olsaydı, yaxşı idi. Amma bunula başlamaq da pis deyil. Sevindim buna. Özü də, 2028-ci ilin axırlarına tamamlamaq istəyirlər. Aktiv iş rejimi olacaq.
- Bu gün beşinci qola vaxt çatmadı?
- "Neftçi"yə uğurlar arzulayıram. "Neftçi" rəqibimiz olsa da, özüm bu komandanın azarkeşi olmuşam. Orda oynamışam, baş məşqçi olmuşam. Bu nəticələr heç birimiz üçün xoş deyil. Səbirli olmaq lazımdır. Futboldur, hamımızın işində belə nəticələr ola bilər. Qaranti deyil ki, "Qarabağ" çempion olacaq. Heç bir komanda üçün belə uğursuzluq istəmərəm. Hər biri öz komandalarımızdır. Avrokuboklarda hamımız bir oluruq. Məncə, səbrlə gözləmək lazımdır. Belə hallar olanda deyirəm ki, demək xeyir var. "Neftçi" böyük tarixə malik klubdur. Əvvəl-axır, yenə öz əvvəlki nəticələrini geri qaytaracaq.
- Qara Qarayev "Neftçi"dən ayrıldıqdan sonra azarkeşlər istəyir ki, karyerasını "Qarabağ"da bitirsin. Onun geri qayıtması realdır?
- Bu gün komandada belə fikir yoxdur. Amma Qaranın çempionatda iştirak etməməsi məni üzür. Təcrübəli futbolçudur, ağıllı insandır. Ən doğrusunu düşünəcək. Bizim komanda olaraq planımızda belə şey yoxdur.
- Onunla təmasınız olub? Əvvəl millidən uzaqlaşdırıldı, "Neftçi"dən uzaqlaşdırıldı. Bu məsələlər haqda onunla danışmısız?
- "Qarabağ"da olanda da millidə oynamırdı. Söhbətimiz olurdu. Belə hallarda çox dərinliklərə getmirəm. Futbolçunun yaşı elə həddədir ki, təcrübəlidir, işin içindədir, daha düzgün görür. Bütün futbolçulara tövsiyyəm o olub ki, darıxmayın, səbir edin. Baş məşqçi rəhbərdir. İntizamını qoruyub-saxlasın, məşqlərdə ən yaxşılardan olmağa çalışsın. Get-gedə çox futbolçuda belə hallar olub. Qara güclü xarakterə malik biridir. Oynamadığı halda da, məşqlərdə ən yaxşılardan olub. Konkret nəsə deməyim, olmayıb. Bir onu bilirəm ki, Qara özünü həmişə günahlandırıb. Burada oynamayanda da, heç vaxt məşqçinin üzərinə atmayıb. Peşəkarlıq onda var. Kiminsə dalınca danışdığını görməmişəm. İnanmıram ki, desin oynatmadılar.
- "Tottenhem"i izləmək üçün Londona getmişdiz?
- Xeyr, getməmişdik. Heç kimi göndərməmişdik.
Oxşar xəbərlər
Ana səhifə
Bütün xəbərlər
Hesabım