Bakı. Mehman Süleymanov - APA-Sport. Rusiya yığması Azərbaycanla oyuna Türkiyədə hazırlaşacaq. “APA-Sport”un məlumatına görə, 2010-cu il dünya çempionatının seçmə mərhələsi çərçivəsində gələn ilin martın 28-də Moskvada millimizi qəbul edəcək ruslar bu oyuna ölkədən kənarda hazırlaşmaq fikrindədir. Bu məqsədlə yenidən Türkiyəni seçən Rusiya yığmasının hollandiyalı baş məşqçisi Qus Hiddink yaxşı tanıdığı FİFA agenti Vyaçeslav Protsenkoya tapşırıqlarını verib.
Rusların təlim-məşq toplanışlarını təşkil edən bu şəxsin sözlərinə görə, rəqibimizin yaxşı hazırlıq keçmək üçün hər cür şəraiti olacaq: “Ötən il milli komandamızın beş günlük təlim-məşq toplanışı zamanı Hiddinkə Türkiyəyə səfər etməyi tövsiyə etdim. Hər halda, mən bu ölkəni 15 ildir işlədiyim müddətdən yaxşı tanıyıram. Fevralda Aralıq dənizi ətrafında 200-dək komanda məşq edir. Təsadüfi deyil ki, Hiddink qarşıdakı mövsümlərarası fasilə müddətində fevral toplanışını yenidən Türkiyədə təşkil etməyi xahiş etdi”.
Qeyd edək ki, ruslar milli komandamızla ilk oyun öncəsi Türkiyədəki hazırlığı fevralın 2-dən 6-dək reallaşdırmağı planlaşdırırlar.

• "Arsenal" Türkiyə millisinin üzvü ilə maraqlanır
• “Zirə”nin legioneri millidə fərqlənib
• UEFA və FİFA-dan Rusiya üçün yeni qərar
• Ən yaxşı adına 5 namizəd
• Keynin heykəli təqdim olunub