İstanbul. Elşən Məmmədov - APA-Sport. Türkiyənin İstanbul şəhərində keçirilən dünya çempionatında yunan-Roma güləşçilərinin mübarizəsinə yekun vurulub. “APA-Sport” agentliyinin məlumatına görə, dünya birinciliyinə 7 “klassik” güləşçi ilə qatılan Azərbaycan yığması 1 qızıl, 2 bürünc medal qazanıb. Yarışın ikinci günündə təmsilçilərimizdən Rafiq Hüseynov daha bir bürünc medala sahib çıxıb. 66 kq çəki dərəcəsində çıxış edən həmyerlimiz 1/16 finalda Reynier Leskay Torresi (Kuba) yensə də, növbəti qarşılaşmada Səid Abdevaliyə (İran) uduzub. Lakin iranlı rəqibinin finaladək irəliləməsi səbəbindən, R.Hüseynov təsəlliverici görüşlərə qatılıb. Bu mərhələdə isə Çonq-Geun Li (Cənubi Koreya), Şərur Vardanyan (İsveç) və Daniel Yaneçiçi (Xorvatiya) məğlub edən pəhləvanımız komandamızın aktivinə sayca üçüncü medalı yazıb.
Qeyd edək ki, dünya çempionatının ilk günündə Elvin Mürsəliyev (74 kq) qızıl, Hacıxan Mustafayev (60 kq) isə bürünc medal qazanıblar.
Digər güləşçilərimizə gəldikdə, Xurşud Babaşov (50 kq) 7-ci, Elçin Əliyev (55 kq) 8-ci, Araz Həsənov (84 kq) 15-ci, Səməd Cəbrayılov (96 kq) isə 13-cü yeri tutublar. Ümumi komanda hesabında 33 xal toplayan millimiz yalnız Türkiyə (59 xal) və İrandan (50 xal) geri qalaraq, dünya çempionatını 49 ölkə arasında üçüncü pillədə başa vurub.

• Parapauerliftinqçilərimiz Avropa Açıq çempionatında 12 medal qazanıb
• Azərbaycan İdman Akademiyası INTI Beynəlxalq Universiteti ilə memorandum imzalayıb
• ASA-nın rektoru: “Qazilərin bərpa prosesinə töhfə verən layihədir”
• Avstriyalı mütəxəssis: “Azərbaycanla əməkdaşlığımızı daha da genişləndirmək istəyirik”
• ASA-nın nəşr etdiyi “Təməldən təfərrüata” kitabının təqdimat mərasimi keçirilib