Bakı. Kənan Həsənov - APA-Sport. Rusiyanın paytaxtı Moskvada Mixail Talın xatirəsinə həsr olunan XX kateqoriyalı beynəlxalq şahmat turniri start götürüb. “APA-Sport” agentliyinin məlumatına görə, üçüncü dəfə təşkil edilən nüfuzlu yarışa Azərbaycan milli komandasının üzvü Şəhriyar Məmmədyarov da qatılıb. Reytinqdə 4-cü olan 23 yaşlı qrossmeysterimiz ilk görüşdə qələbə qazana bilməyib. Qara fiqurlarla Peter Lekoya (Macarıstan) qarşı oynayan təmsilçimiz heç-heçə ilə kifayətlənib. Ruslan Ponomaryovla (Ukrayna) Boris Qelfandın (İsrail) görüşündə də qalib müəyyənləşməyib. Digər oyunlarda Vladimir Kramnik (Rusiya) Aleksey Şirovu (İspaniya), Aleksandr Morozeviç (Rusiya) Yevgeni Alekseyevi (Rusiya), Vasili İvançuk (Ukrayna) isə Qata Kamskini (ABŞ) məğlub edib. Bu gün II turun oyunları keçiriləcək: V. Kramnik - P. Leko, Ş. Məmmədyarov - A. Morozeviç, Y. Alekseyev - R. Ponomaryov, B. Qelfand - V. İvançuk, A. Şirov - Q. Kamski.
Qeyd edək ki, dairəvi sistemlə keçirilən yarış avqustun 27-də başa çatacaq. Avqustun 29-30-da isə 18 şahmatçının iştirakı ilə “blits-turnir” təşkil olunacaq.

• Parapauerliftinqçilərimiz Avropa Açıq çempionatında 12 medal qazanıb
• Azərbaycan İdman Akademiyası INTI Beynəlxalq Universiteti ilə memorandum imzalayıb
• ASA-nın rektoru: “Qazilərin bərpa prosesinə töhfə verən layihədir”
• Avstriyalı mütəxəssis: “Azərbaycanla əməkdaşlığımızı daha da genişləndirmək istəyirik”
• ASA-nın nəşr etdiyi “Təməldən təfərrüata” kitabının təqdimat mərasimi keçirilib