Fransanın paytaxtı Parisdə keçirilən cüdo üzrə dünya çempionatına sabah komanda yarışları ilə yekun vurulacaq. Apasport.az saytının məlumatına görə, London-2012-yə lisenziya xarakterli son mundial Azərbaycan idmançıları üçün vaxtından əvvəl başa çatıb.

Təəssüf ki, yarışın ilk günündə İlqar Müşkiyevin (60 kq) qazandığı “bürünc” təmsilçilərimiz üçün birinci deyil, elə sonuncu olub. Onunla bərabər Parisə yollanan digər cüdoçularımız isə vətənə əliboş qayıdacaqlar.

Komandamız bu dəfə ən azından ötən ilki uğuru təkrarlaya bilməsə də, Azərbaycan yığmasının dünya çempionatında uğurlu seriyasını qırılmağa qoymayıb. Bu da təbii ki, millimizi fiaskodan qurtaran İlqar Müşkiyevin sayəsində baş verib. 21 yaşı hələ tamam olmayan idmançı 10 illik seriyanı davam etdirib. Onun sayəsində ölkəmiz 2001-ci ildən başlayaraq, bütün dünya çempionatlarında ən azı 1 medala sahib olur.

Bununla yanaşı, 2009-cu ildə gənc cüdoçular arasında Ermənistanda keçirilmiş Avropa çempionatında İrəvanda Azərbaycan bayrağını dalğalandırmış (gümüş medal) İlqar adını növbəti dəfə tariximizə qızıl medallarla yazdırıb. O, müstəqillik illərində ölkəmiz üçün dünya çempionatlarında qazanılmış 10-cu medalın sahibi olub.

Qeyd edək ki, milli komandamız 1993-cü ildən son dünya çempionatına kimi 10 medal qazanıb. Bunlardan 2-si gümüş, 8-i bürüncdür. Mundialda ilk fərqlənən cüdoçumuz isə Nazim Hüseynovdur. O, müstəqillik illərində ilk Olimpiya çempionumuz olduğu kimi, bu siyahıda da birincidir.

Cüdoçularımızın dünya çempionatlarında medalları

İl	Keçirildiyi ölkə, şəhər	İdmançı	Tutduğu yer
1993	Kanada, Hamilton	Nazim Hüseynov (60 kq)	II yer
2001	Almaniya, Münhen	Elxan Rəcəbli (81 kq)	III yer
		Rəsul Səlimov (90 kq)	III yer
2003	Yaponiya, Osaka	Mövlud Mirəliyev (açıq çəki)	III yer
2005	Misir, Qahirə	Nicat Şıxəlizadə (60 kq)	III yer
2007	Braziliya, Rio de Janeyro	Elnur Məmmədli (73 kq)	II yer
2009	Hollandiya, Rotterdam	Kifayət Qasımova (57 kq)	III yer
2010	Yaponiya, Tokio	Elxan Məmmədov (90 kq)	III yer
		Ramilə Yusubova (63 kq)	III yer
2011	Fransa, Paris	İlqar Müşkiyev (60 kq)	III yer

Azərbaycan milli komandasının dünya çempionatlarındakı medallarının əyarı və sayı

Qızıl medal	Gümüş medal	Bürünc medal	Cəmi
-	2	8	10

Tahir HÜMMƏTOV

• Azərbaycan millisi Zaqatalada toplanışa start verdi
• "Qarabağ Mechack 9030" komandasından uğurlu nəticələr
• Azərbaycan Kamandan Oxatma Federasiyasında idmançılara yeni idman dərəcələri təqdim edilib
• Qaşım Maqomedov: "Bu medal mənim üçün böyük əhəmiyyət kəsb edir"
• Yenilənmiş Olimpiya medalları idmançılarımıza təqdim edilib