Türkiyə yığmasının məşhur idmançısı Halil Mutlu Azərbaycan Ağır Atletika Federasiyasının rəsmi saytına müsahibə verib. Apasport.az-ın məlumatına görə, 3 qat Olimpiya, 5 qat dünya və 9 qat Avropa çempionu olan canlı əfsanə Azərbaycan idmançısı Valentin Xristovun qitənin ən güclüsü olması ilə bağlı fikirlərini açıqlayıb. O, təmsilçimizin London-2012-də də medal qazanacağına inandığını deyib.

- Turnirin təşkilatçılığı haqda nə deyə bilərsiniz?
- Məncə, hər şey qaydasındadır. Nəzərə alsaq ki, bu il Olimpiada ilidir, turnirin iştirakçı sayını da qənaətbəxş hesab etmək olar. Yarış yaxşı səviyyədə təşkil olunub. Düzdür, xırda çatışmazlıqlar da ola bilər. Ancaq bunlar təbii şeydir. Bu haqda fikri qonaqlarımız daha yaxşı deyə bilər. Fikrimcə, hər şey yaxşıdır. Türk qonaqpərvərliyimizi bütün qonaqlarımıza göstərməyə çalışırıq. Medallar uğrunda mübarizə isə sona qədər davam edir. 53 kq çəki dərəcəsində qadınların mübarizəsinə şahidlik etmək xoş idi. Sona qədər birdən-birə 8 idmançı medal şansını saxlayırdı. Böyük zövq verən yarış izləyirik.

- Azərbaycan yığmasının üzvü Valentin Xristov 56 kq çəki dərəcəsində qızıl medal qazandı. Nəzərə alaq ki, o, vaxtilə sizin çıxış etdiyiniz çəkidə mübarizə aparır. Onun perspektivi barədə nə deyə bilərsiniz?
- Çox istedadlıdır. Bu, aşkar görünür. Gənc olmasına baxmayaraq, çox güclüdür. Həm də ki, uzun illərdir, bu çəkidə Olimpiadalarda Avropanı layiqincə təmsil edən idmançı yox idi. Bizim qitədən olan birisinin belə uğurla çıxış etməsi çox gözəldir. Xristov London Olimpiadasında çinliləri çox narahat edəcək.

- Valentinin London-2012-də medal şansını necə qiymətləndirirsiniz?
- O, medalı artıq təmin edib. Buna əmin ola bilərsiniz. Qalır həmin medalın əyarını öyrənmək. Qızıl, gümüş və bürünc olacağını deyə bilmərəm, ancaq medal alacağı dəqiqdir. Mən belə düşünürəm. Buradakı çıxışını izləyəndə görünür ki, hazırkı nəticələri rahat qazandı və hər yanaşmasına azı 5 kiloqram da əlavə edə bilər.

- O, gənclər arasında Avropa rekordlarını yenilədi. Deyəsən, növbədə sizin rekordlarınızdır…
- İnşallah! Bu, gec-tez olacaq. Yaşayarıq, görərik. Təbii ki, bir rekord sahibi kimi deyə bilərəm ki, mənim üçün bu nə qədər gec baş versə, bir o qədər yaxşıdır.

- Yəni, Xristovu qısqanmırsız?
- Xeyr. Bu idmandır. Yenmək də var, yenilmək də. O, gəncdir, hələ böyük qələbələri qabaqdadır. Rekordumu qırarsa, onun adına sevinərəm. Xristova uğurlar arzulayıram.

• “Bakı-Xankəndi” Azərbaycan velosiped yarışının təşkilinə həsr olunmuş iclas keçirilib
• “Azərlotereya” çempion axtarır!
• Azərbaycan millisi Zaqatalada toplanışa start verdi
• "Qarabağ Mechack 9030" komandasından uğurlu nəticələr
• Azərbaycan Kamandan Oxatma Federasiyasında idmançılara yeni idman dərəcələri təqdim edilib