Həm lisenziya, həm çempion

20.04.2012 - 20:35

Bolqarıstanın paytaxtı Sofiyada güləş üzrə London Yay Olimpiya Oyunlarına vəsiqə verən Avropa təsnifat turniri start götürüb. Apasport.az saytının məlumatına görə, öncə mübarizəyə sərbəst güləşçilər çıxıb. Azərbaycan yığmasının üzvləri 3 çəki dərəcəsində xalça üzərinə çıxıblar.

Amma təmsilçilərimizdən yalnız biri London-2012-yə lisenziya qazana bilib. Bu uğura isə Toğrul Əsgərov imza atıb. O, həm turnirin qalibi adını, həm də olimpiya lisenziyasına sahib çıxıb.

Digər iki güləşçimiz isə uğursuzluqla üzləşib.

1/8 final

55 kq

Bu çəkidə ölkəmizi təmsil edən Mahmud Məhəmmədov ilk döyüşündə Vladislav Andreyevlə (Belarus) qarşılaşıb. Rəqibinə heç bir şans verməyən təmsilçimiz ilk döyüşündən qalib ayrılıb. O, ilk hissədə 1:0, növbəti hissədə isə 2:0 hesablı qələbəyə sevinib.

1/4 finalda Məhəmmədovun rəqibi rumıniyalı Andrey Dukov olub. Təmsilçimiz hər 2 hissədə uduzub - 0:1, 4:5.

60 kq

Avropa çempionumuz Toğrul Əsgərov da 1/8 final mərhələsinə uğurla başlayıb. Həmyerlimiz Aleksandr Kontoyevlə (Belarus) görüşdə hər 2 hissəsini qalib kimi bitirərək (1:1, 4:0), növbəti mərhələyə yüksəlib.

Növbəti cəhddə həmyerlimiz alman Tim Şleyxerdən üstün olub. O, ilk hissədə 2:0, ardınca 4:0 hesablı qələbəni bayram edən Əsgərov yarımfinala yüksələrək, orada ukraynalı Aleksandr Fedorişinə qalib gəlib - 2:0 və 4:1. Əsgərova finala çıxmaq olimpiya lisenziyası qazanmaq üçün yetərli olub. Nəticədə London-2012-yə 33-cü lisenziyamızı qazandıq.

Finala gəlincə, Toğrul həlledici görüşdə yerli güləşçi Anatoli Qydea ilə qarşılaşıb. Bolqar idmançısına da qalib gələn (2:0, 1:1) həmyerlimiz turniri birinci yerdə başa vurub.

96 kq

Saypulla Absaidovun yetirmələrindən Aslanbəy Alborov Georgi Atanasov Sredkovla (Bolqarıstan) qarşılaşıb. Təəssüf ki, ağır çəkili pəhləvanımız ev sahiblərinin güləşçisi ilə bacarmayıb və 1:2 hesabı ilə uduzub. Bununla da o, növbəti mərhələyə yüksəlmək şansını itirib.