Azərbaycan millisinin güləşçisi Mariya Stadnikin gələcək karyerasına aydınlıq gəlib.

Apasport.az saytının məlumatına görə, milliləşən legionerimiz karyerasını başa vuracağı ilə bağlı şayiələri təkzib edib.

Olimpiya Oyunlarının dördqat mükafatçısı Dünya Güləş Birliyinin saytına açıqlama verib. 34 yaşlı güləşçi Paris-2024-də də iştirak etmək arzusunda olduğunu bildirib: “Düşünürəm ki, mənim güləşmək arzum hələ də var və mən yüksək potensialımdan yararlanmalıyam. Tokio-2020-dən qayıdandan sonra güləşməyə davam etmək barədə qərar verdim. Bütün dostlarım və doğmalarım mənə inanırlar. Oğlum istəyir ki, mən güləşlə məşğul olmağa davam edim. O, çox güclü olduğumu deyir”.

Mariya 5-ci Olimpiya medalının qazanmaq arzusunu da gizlətməyib: “Çox istərdim ki, beş olimpiya medalım olsun. Hər medal həyatımın bir səhifəsi, yolumun bir parçasıdır. Olimpiya loqosu 5 halqadan ibarətdir. 5 olimpiya medalımın olması da tarixə düşəcək”.

Qeyd edək ki, Olimpiadalarda 4 medal qazanan Stadnik Parisdə də uğura imza atsa, dünya güləş tarixində 5 mükafat əldə edən ilk idmançı olacaq.
 

• “İronman 70.3 Baku” öncəsi “İronkids” və “Fun Run” keçirilib
• “IRONMAN” Azərbaycanda: 10 il əvvəl başlayan yolun tarixi startı
• Dünya Kubokunun Yerli Təşkilat Komitəsinin növbəti iclası keçirilib
• Kembric Universitetinin ekspertləri Azərbaycan İdman Akademiyasında təlimlər keçirəcəklər
• “IRONMAN 70.3”: Bakının bəzi yollarında nəqliyyatın hərəkəti tənzimlənəcək