Misli Premyer Liqasının XXIV turunun "Qarabağ" - "Sabah" matçından (1:1) sonra ev sahiblərinin baş məşqçisi Qurban Qurbanovun mətbuat konfransı keçirilib.
"Hər iki komandanın futbolçularına təşəkkür edirəm. Belə soyuq havada, sonlara yaxın da oyunun sürəti artdı. Dinamik futbol oynadılar. Bu oyunda hansısa komanda uduzsaydı, çox üzülərdilər. Hər bir futbolçudan razı qaldım. İkimiz də bir xal qazandıq. Azarkeşlərimizə təşəkkür edirəm. Sanki oyunun əvvəlində bir az darıxdırıcı kimi görünürdü oyun. Ancaq sonradan oyun aktivləşdi, maraqlı matç alındı".
- Murad Musayev "Sabah"ı çalışdıranda, 2-3 qələbə qazanmışdı "Qarabağ"a qarşı. Bu mövsüm Kurban Berdiyev və Vasili Berezutski sizə uduzmayıb. Rusiyalı məşqçilərlə sizin komandanızın nəticələri təsadüfdür, yoxsa yaxşı analiz edirlər?
- Deyəcək bir şey yoxdur. Bura gəliblər, istəklidirlər, böyük təcrübə keçmiş məşqçilərdir. Bəlkə "Sabaha"a uduzacağıq, ya udacağıq. Hər məşqçi, komanda rəqibi analiz edir. Normaldır. Görünən odur ki, biz daha da çox analiz etməliyik. Belə termin yoxdur ki, həmişə "Qarabağ", Qurban Qurbanov qalib gəlməlidir.
- 7-8 futbolçunun müqaviləsi bitir. Onlarla hazırki durum necədir?
- Vaxtımız var. Mövsüm boyu fikirlər, düşüncələrdə dəyişikliklər olur. Hansısa futbolçunu göndərməyi düşünürsən, sonra saxlamaq istəyirsən. Ya da, əksinə. Mövsümün sonuna kimi vaxt var. Sonda dəqiq məlumatlar bildiriləcək.
- Buraxdığınız qol epizodunu necə şərh edərdiniz?
- O epizodda daha çox Sekidikanın ustalığını qeyd etmək lazımdır. Daha diqqətli olmaq lazımdır. Mateus Silvaya irad deyildi, motivasiya verdim ki, daha bərk oynamaq lazımdır.
- Bu oyunda bir xal qazandız, yoxsa itirdiz?
- Qazandıq. Xalımızın üzərinə xal gəlirsə, qazanmış hesab edirəm.
Oxşar xəbərlər
Ana səhifə
Bütün xəbərlər