Voleybol üzrə Azərbaycan çempionatının gümüş mükafatçısı “Lokomotiv” heyətinə daha bir legioner cəlb edib. Apasport.az saytının məlumatına görə, paytaxt klubu Pekin olimpiadasının gümüş mükafatçısı, ABŞ yığmasının üzvü Tayibu Xaneef-Parkla 1 illik müqavilə bağlayıb.

1979-cu il təvəllüdlü və 200 sm boya malik voleybolçunun Avropada ilk peşəkar komandası “Kerdisa Reggio” (İtaliya) olub. 2002/2003-cü illərdə Apennin yarımadasında çıxış edən Xaneef-Park növbəti mövsümdə Asiyaya üz tutub. 1 il orada “Takefuji Bamboo” klubunun şərəfini qoruyan amerikalı legioner yenidən “köhnə qitə”yə qayıdıb. 2006/2007-ci illərdə Rusiya “Kazanoçka”sında çıxış edib. Burada da 1 il oynadıqdan sonra Türkiyənin “Əczaçıbaşı” komandasına gedib. Maraqlıdır ki, o, qardaş ölkədə də cəmi 1 il qərar tutub və 2008-ci ildə yenidən Yaponiyaya qayıdıb.

Bu ölkədə son klubu “Pioneer Red Uings” olan Xaneef-Park 2001-ci ildən ABŞ yığmasının da şərəfini qoruyur. Milli komandada 201 oyun keçirən yeni “dəmiryolçu” Dünya çempionatının (2002), Dünya çempionları kubokunun (2005) və Pekin Olimpiya Oyunlarının (2008) gümüş mükafatçısıdır. Dünya Qran-Prisi (2003, 2004) və Dünya kuboklarında (2003, 2007) isə bürünc medala sahib olub.

Qeyd edək ki, “Lokomotiv” bu mövsüm ölkəmizi “Çelenc cup”da təmsil edəcək.

• Azərbaycan milliləri Avropa Liqasında iştirak edəcəklər
• Millimiz Polşaya yollanıb
• Zaur Hacıyev "Benfika"nın matçını idarə edəcək
• Zaur Hacıyev CEV Kubokuna təyinat alıb
• AVF rəsmisinə növbəti dəfə təyinat verilib