Qadın voleybolçular arasında Çempionlar Liqasının IV turunun ilk 2 oyun günündən sonra pley-off mərhələsinə yüksələn klubların sayı 5-ə çatıb. Apasport.az saytının məlumatına görə, qrup mərhələsinin başa çatmasına 2 tur qalmış 3 ölkənin komandası adını növbəti mərhələyə yazdırıb.

Onlardan ikisi – “Dinamo” (Kazan, Rusiya) və “Fənərbaxça” (Türkiyə) Azərbaycan klublarının rəqibləridi. A qrupunda yer alan Tatarıstan təmsilçisi məhz “Azərreyl”i məğlub etdikdən sonra bu hüquqa yiyələnib. Ən yaxın izləyicisi “Lokomotiv”i (Azərbaycan) 6 xal qabaqlayan komanda son 2 turun nəticəsindən asılı olmayaraq, mübarizəni davam etdirəcək.

E qrupunda “Telekom”un rəqibi olan “Fənərbaxça” “İmpel”i (Polşa) məğlub etməklə, mərhələ adlayıb. Onlar da ən yaxın izləyicisi “Dresdner”dən (Almaniya) 6 xal irəlidədi.

Həmçinin, B qrupundan “Vakıfbank” (Türkiyə), F qrupundan isə “Pyaçentsa” (İtaliya) və “Dinamo” (Moskva, Rusiya) pley-offa yüksəlib.

Qeyd edək ki, IV turunun oyunları bu gün başa çatacağından klubların sayının artacağı istisna deyil. 

• Azərbaycan Voleybol Federasiyası hakimlərin hazırlığı üzrə seminarın sonuncu mərhələsini keçirib
• Azərbaycanlı mütəxəssis 1/4 final görüşündə
• Azərbaycan millisi İspaniyada AVRO-2026-nın təsnifat turnirində mübarizə aparacaq
• Yüksək Liqada pley-off mərhələsinin təqvimi bəlli olub
• “Azərreyl”dən inamlı qələbə