Qadın voleybolçular arasında Türkiyə Sultanlar Liqasında IV turun oyunları keçirilib. Apasport.az saytının məlumatına görə, qarşılaşmalarda Azərbaycan millisinin oyunçuları bir-birinə rəqib olublar.

Belə ki, yığmamızın hücumçusu Polina Rəhimovanın şərəfini qoruduğu “Fənərbaxça” Marqarita Əzizovanın çıxış etdiyi “Beşiktaş”la üz-üzə gəlib. Görüş “sarı-lacivərdlilər”in 3:0 (25:20, 25:19, 25:14) hesablı qələbəsi ilə başa çatıb. Polinanın 20 xal topladığı matçda Marqarita son setdə meydana girib və xal qazanmayıb.

Milllimizin kapitanı Odina Bayramovanın formasını geyindiyi “Seramiksan” isə Yana Kulanın uğurları üçün çalışdığı “Bəylikdüzü”nu qəbul edib. Qarşılaşma ev sahiblərinin məğlubiyyəti ilə nəticələnib - 2:3 (27:25, 20:25, 20:25, 25:21, 9:25). Odinanın 6 xal topladığı görüşdə Yana 23 dəqiq zərbə vurub.

Beləliklə, IV turdan sonra “Fənərbaxça” 12 xalla turnir cədvəlində 2-ci yerdədi. “Seramiksan” (5 xal) 7-ci, “Bəylikdüzü” (3) 8-ci və “Beşiktaş” (3) 9-cu pillədə qərarlaşıb. 

• Möhtəşəm geridönüş - Türkiyə Almaniyanı məğlub etdi
• Eldar Zülfüqarov Avropa Liqasının oyunlarına təyinat alıb
• Qadın və kişi voleybolçulardan ibarət millimiz Avropa Liqasında mübarizəni davam etdirirlər
• Bakıda keçiriləcək çimərlik voleybolu üzrə beynəlxalq turnirə 40 komanda qatılacaq
• Gəncə klubunda üç ayrılıq