Çimərlik voleybolu üzrə Azərbaycan yığmaları Rio-de-Janeyro Olimpiadasına yollanmaq şansını itirib. Apasport.az saytının məlumatına görə, buna Avropa Voleybol Konfederasiyasının cütlüklərimizi Olimpiadaya lisenziya xarakterli “Kontinental kuboku”nda diskvalifikasiya etməsi səbəb olub.

Belə ki, ilk 3 mərhələdən uğurla adlayan kişilərdən ibarət komandamız mübarizəni IV mərhələdən davam etdirməli olsa da, yarışdan rəsmən kənarlaşdırılıb. Yığmamızı burada III mərhələdə təmsilçilərimizdən sonra 4-cü pillədə qərarlaşan Portuqaliya voleybolçuları əvəzləyiblər.

Qadınlardan ibarət cütlüyümüzün yarışa qatılmasını isə Azərbaycan Çimərlik Voleybolu Federasiyası məqsədəuyğun saymayıb. Buna görə də onların ilk 3 mərhələdə qazandığı qələbələr faydasız nəticəyə çevrilib. Yunanıstanda olacaq qrup oyunların isə yığmamızı hansısa ölkə əvəzləməyəcək.

Əldə etdiyimiz məlumata görə, kişilərin diskvalifikasiya olunmasında milliləşdirilmiş cütlüklər - Bernardo Romano ilə Leonid Qritsay və Neylton Santosla Yaroslav Rudikin yerli federasiya ilə aralarında problem yaranması rol oynayıb. Onların hətta Azərbaycan Çimərlik Voleybolu Federasiyasından şikayət etdiyi də bildirilir.  

• Millimiz Portuqaliya ilə qarşılaşacaq
• Möhtəşəm geridönüş - Türkiyə Almaniyanı məğlub etdi
• Eldar Zülfüqarov Avropa Liqasının oyunlarına təyinat alıb
• Qadın və kişi voleybolçulardan ibarət millimiz Avropa Liqasında mübarizəni davam etdirirlər
• Bakıda keçiriləcək çimərlik voleybolu üzrə beynəlxalq turnirə 40 komanda qatılacaq