Misli Premyer Liqasında geridə qalan 8 turdan sonra “Zirə” turnir cədvəlinə başçılıq edir. Bu məlumatı artıq iki aydır ki, veririk. Geridə qalan 3 turdan sonra, 5 turdan sonra, 7 turdan sonra... Heç-heçə edirlər – birinci yerdə, uduzurlar – yenə liderdirlər.
Əlqərəz, “Zirə” iki aydır zirvədədir.
Digər komandaların “hələ çempionat təzə başlayıb, bilmək olmaz” kimi şablon təsəlliləri son nəfəslərini verir. Yox, təbii ki, mən də razıyam, 8 həftə nədir ki?! Sadəcə, mən bir suala cavab tapmaqda çətinlik çəkirəm: “Zirə” niyə liderdir? Sualı bu cür də vermək olar: “Zirə” necə liderdir?
Səhv başa düşülməsin, Rəşad Sadıqovun da, komandanın ayrı-ayrılıqda heç bir oyunçusunun da zəhmətini danmaq kimi bir fikrim yoxdur, elə hədsizlik də etmərəm. Ən azından, Allah göydən baxır. Amma və lakin, zamanda səyahət etməyin necəsə bir yolunu taparaq, 2 ay əvvələ qayıdıb soruşsan, adamların özü də deməz ki, hədəfimiz çempionluqdur. Belə baxanda, heç indi də demirlər.
Yəni, cavabını tapa bilmədiyim bu sualın yaxından-uzaqdan “Zirə” ilə əlaqəsi yoxdur. Yeri lap da möhkəm olsun. Əlaqəsi var, Premyer Liqanın transfermarkt qiymətlərinə görə ən bahalı heyətə sahib komandası olan Neftçiyə, əlaqəsi var hələ çempionat başlamamış yekdilliklə hamımızın çempion elan etdiyi “Sabah”a, “Qarabağ”ı deməyə ehtiyac var? Məncə də yoxdur.
Düşünürəm ki, az-çox sualımın mahiyyəti ortaya çıxır. Deməli turnir cədvəlinə başçılıq etmək üçün Murad Musayev kimi səhər-axşam oyunçularını medianın önünə qurban kimi atmaq, hakim, jurnalistlərlə qanlı-bıçaqlı olmaq lazım deyilmiş. Və ya transfer xəbərlərini sosial mediada möhtəşəm dizaynlarla, peşəkar mütəxəssislərin hazırladığı afişalarla təqdim etmək də siz deyən, vacib deyilmiş. İcazənizlə, qısa haşiyəyə çıxım. “Səbail”in sosial media səhifələri və sayt dizaynı barədə niyə danışan yoxdur? Uzatmayacam, “Sabah”dan daha yaxşıdır. Hətta, bu sahədə bütün Premyer Liqa təmsilçilərini qabaqlayır.
Liqanın ən üst pilləsində qərarlaşmaq üçün heç Müşahidə Şurası da lazım deyilmiş. Medianı marketinqdən, marketinqi mətbuatdan, ictimaiyyətlə əlaqələri kommunikasiyadan ayırmaq, nə bilim, kommunikasiya, kommersiya, vitse – prezident, departamentlər, baş icraçı direktor, Şinyaşiki, isveçli alim... Başım şişdi.
Hə, heç Olanare də lazım deyilmiş, odu bax, Qismət Alıyev 2 qolla əyləşib yuxarı başda. “Neftçi Arena”nın da adı yenicə dəyişmiş olmasaydı, təklif edərdim “Səbir Arena” olsun. Çünki azarkeşlərin bundan daha çox eşitdiyi ikinci bir söz yoxdur. Nə isə, əsas odur, Mutu kostyumları və saç düzümü ilə meydançanın kənarında Rəşad Sadıqovdan daha xarizmatik görünür. 1-cilik nədir ki, boş şeydir.
Gələk Qarabağa, onsuz “Qarabağ” da deyəsən gəlir zirvəyə. Ona görə axıra saxlamışam. Avropa Liqasında hər şey çiçək kimi, komandada atmosfer yüksək, hoca xoşbəxt, azarkeşlər sevincli, hava günəşli, Bəhlul isə zədəli. “Atlılar” Avropa Liqasının qrup mərhələsindən əlavə, Misli Premyer Liqasında da ortaq liderdir.
Sualım isə hələ də aktuallığını qoruyur: “Zirə” niyə liderdir?
Rasim Sultanzadə
Oxşar xəbərlər
Ana səhifə
Bütün xəbərlər
Hesabım