Azərbaycanın kamandan oxatanı lisenziya xarakterli Avropa çempionatında çıxış edəcək

30.04.2008 - 10:25

Bakı. Aqşin Əliyev - APA-Sport. Mayın 12-dən 17-dək Fransanın Vital şəhərində kamandan oxatma üzrə Avropa çempionatı keçiriləcək. “APA-Sport” agentliyinin məlumatına görə, Pekin Yay Olimpiya Oyunlarına təsnifat xarakterli yarışda Azərbaycanın bir idmançısı Emil Akçurin bacarığını nümayiş etdirəcək. Bu, kamandan oxatanımızın olimpiadaya lisenziya qazanması üçün son şansı olacaq. İndiyədək Yay Olimpiya Oyunlarına 64 vəsiqənin 46-nın sahibi məlumdur. Qitə birinciliyində isə daha 3 idmançı lisenziya qazanacaq. E.Akçurin qarşıya qoyulan vəzifənin öhdəsindən gəlmək üçün ilk növbədə təsnifat mərhələsini adlamalı, daha sonra mükafatçılar sırasında yer almalıdır. Avropa çempionatı zamanı, həmçinin, Avropa Kamandan Oxatma Federasiyasının hesabat-seçki konfransı olacaq. Tədbirə Azərbaycan Kamandan Oxatma Federasiyasının prezidenti Şahin Mövsümov da qatılacaq.