Azərbaycan ağırlıqqaldıranı Sərdar Həsənov üçün xoş xəbər var. Milli komandamızın baş məşqçisi Vahid Nəzərovun apasport.az saytına verdiyi məlumata görə, 23 yaşlı atlet İtaliyanın Linyano şəhərində təşkil olunmuş Avropa çempionatının “kiçik” bürünc medalına layiq görülüb.

Qitə birinciliyi yarım il əvvəl keçirilsə də, 62 kq çəki dərəcəsində mübarizə aparmış həmyerlimizə indi mükafat verilir. Məsələ burasındadır ki, həmin yarışda birinci yeri tutan moldovalı ağırlıqqaldıran dopinq-testdə ilişib. Qanında istifadəsi qadağan olunmuş dərman preparatı tapıldığından qızıl medal onun əlindən alınıb.

Bununla da, birdən qaldırmada 125 kq-ın öhdəsindən gələrək, 4-cü sırada qərarlaşmış Sərdar avtomatik olaraq, bir pillə irəliləyib. Ona çempionatın “kiçik” bürünc medalı təqdim olunub. Ümumi nəticədə isə Həsənov 275 kq-lıq göstərici ilə 5-ci yerə yüksəlib.

Qeyd edək ki, Avropa çempionatında daha iki atletimiz Zülfüqar Süleymanovla (62 kq) Turan Mirzəyev (69 kq) də “kiçik” bürünc medallara yiyələniblər.

• Olimpiyaçılarımızın aşılanmaya məruz qalan medallar yenisi ilə əvəz edilib
• Azərbaycan Milli Olimpiya Komitəsində Təhlükəsiz İdman Komissiyası təsis edilib
• Parapauerliftinqçilərimiz Avropa Açıq çempionatında 12 medal qazanıb
• Azərbaycan İdman Akademiyası INTI Beynəlxalq Universiteti ilə memorandum imzalayıb
• ASA-nın rektoru: “Qazilərin bərpa prosesinə töhfə verən layihədir”