Ruslan Abışov məşqçisi ilə kapitanına çatdı

08.06.2013 - 10:07

Ruslan Abışov Azərbaycan milli komandasında 4-cü qolunu vurub. Apasport.az saytının məlumatına görə, 26 yaşlı yarımmüdafiəçi bu dəfə 2014-cü il dünya çempionatının seçmə mərhələsində Lüksemburq yığması ilə “Bakcell Arena”da 1:1 hesabı ilə nəticələnən yoldaşlıq görüşünün 71-ci dəqiqəsində başqa topu qapıdan keçirib. Ancaq rəqib bundan 8 dəqiqə sonra tarazlığı bərpa etdiyindən, Ruslanın qolu qələbə üçün yetmədi.

Millimizdə debütünü 2009-cu ilin sentyabrın 5-də Finlandiya yığmasına Lənkəranda 1:2 hesabı ilə uduzduğumuz rəsmi oyunda edən Abışov az sonra qol hesabını açdı. Bu, noyabrın 18-də Birləşmiş Ərəb Əmirliklərində keçirilən beynəlxalq turnirdə Çexiya yığmasına 2:0 hesabı ilə qalib gəldiyimiz oyunda olub. Maraqlıdır ki, həmin vaxt da başqa qol vuran futbolçu ardından yenə “ikinci mərtəbədə”də oynamaq bacarığını göstərib. Bu, 2011-ci ilin martın 29-da Belçika yığmasına Brüsseldə 1:4 hesabı ilə uduzduğumuz rəsmi oyun idi.

Ruslanın son 2 il isə cari seçmə mərhələdə ev oyunlarımıza təsadüf edib. O, startda İsrail yığması ilə Tofiq Bəhramov adına Respublika stadionunda 1:1 hesabı ilə nəticələnən matçda millimizə xal qazandırdı. İndi isə o, yığmamızın “Bakcell Arena”da debütündə ilk qolunun müəllifi kimi tarixə düşdü. Abışov ilk 2 qolunu “Neftçi”nin, sonrakıları isə müvafiq olaraq “Xəzər Lənkəran”ın və “Rubin”in futbolçusu kimi vurub.

Ruslan millidə qollarının sayına görə kapitan Rəşad Sadıqova çatıb. Onun seçmə mərhələlərdə 3 qol vurduğunu nəzərə alsaq, siyahıda məşqçisi Nazim Süleymanov, komanda yoldaşları Rauf Əliyevlə Vüqar Nadirov, habelə artıq karyerasını başa vuran Fərrux İsmayılovla eyni pillədədir.