Avropa liqasının qrup mərhələsinin "Qarabağ" - "Hakken" (2:1) matçından sonra mətbuat konfransı keçirilib.
Apasport.az xəbər verir ki, təmsilçimiz "Qarabağ"ın baş məşqçisi Qurban Qurbanov əvvəlcə oyun haqqında fikirlərini bildirib.
Təcrübəli mütəxəssis daha sonra jurnalistlərin suallarını cavablandırıb:
"Futbolçularımı təbrik edirəm. Onlara təşəkkürümü bildirirəm. Azarkeşlərimizi təbrik edirəm. Neçə illərdir ki, belə şansımız olmuşdu, amma istifadə edə bilməmişdik. Hətta son saniyələrdə uğur əldə edə bilərdik, qaçmışdı. Şükür Allaha bu gün hər şey gözəl sonluqla başa çatdı. Uzun illərdir ki, gözlənilən uğur əldə etdik. Hansı ki, bunu təkcə biz yox, xalqımız da gözləyirdi. Onlara görə çox sevinirəm. Belə uğuru əldə etmək həm futbolumuza böyük təkan, həm də futbolçularımıza inam verəcək. Böyük komandaların Bakıya gəlməsi, belə turnirlərdə, oyunlarda oynamaq ancaq Azərbaycan futboluna fayda verə bilər. Buna görə şadam. Sizi də təbrik edirəm. Gərgin oyunlarda bizimlə oldunuz".
-Doqquz il əvvəl Bakıdakı "İnter"lə oyunu xatırlayırıq. Onda demişdiz ki, yolumuza davam edəcəyik. Buna nail oldunuz. Bu hədəfə çatmaq nə qədər çətin idi?
-Belə hal yaşanmışdı. Bəzən bizim kimi komandalar üçün belə şanslar çox nadir hallarda olur. O şansı itirəndə, komandaya, rəhbərliyə, kollektivə təsir edir. Bir də gözləyirsən ki, nə vaxt şans olacaq. Beu şans dəfələrlə oldu. Məncə, hakimin saymadığı qola, geriyə qayıtmaq lazım deyil. Niyə? Çünki yenidən o günləri yada salmaq heç də yaxşı hal olmaz. Amma inanın ki, bəlkə də o oyunun, o qolun sayılmamasının bizim üçün faydası daha çox oldu, nəinki ziyanı. Əminliklə deyirəm. Bəli 9 il əvvəl o siyahıda olacaqdıq. Cənab prezident də bizə dəyər, təsəlli vermişdi. Sanki klub daha çox möhkəmləndi, məsuliyyətimiz çoxaldı. Bizə birbaşa ölkə başçısı tərəfindən diqqət ayrılmışdı. Həmin oyunun daha yaxşı formalaşmağımız üçün faydası oldu. Elə matçlar oldu ki, son saniyələrdə şansımızı əldən verdik. Bəzən elə matçlar oldu ki... PAOK-u evdə, səfərdə udduq. Amma səfərdə "Fiorentina"nı uddular. Elə hallar olmuşdu ki, bu, daha çox təsir etmişdi. Amma bu gün hər şey çox yaxşı bitdi. Bəlkə də bunun ləzzəti daha yaxşı olacaq. İllər boyu nəticəni gözləyəndə, əziyyətin yerdə qalmayanda, uğuru əldə edəndə, ola bilər ki, daha davammiyətli olsun. Kluba, futbolçularımıza daha çox fayda versin. Bu hallar qaçılmazdı. Böyümək üçün belə şeyləri soyuqqanlı, normal qəbul etməliyik ki, bizə təsir etməsin. Əlimizdə bəhanə tutmalı deyilik ki, o vaxtı belə oldu, ona görə uduzmuşuq.
-Potensial rəqiblər bəllidir...
-Hər biri Çempionlar Liqasında oynayası komandalardır. Hətta o klubların içərisində ÇL-in qalibi olmağı qarşısına məqsəd qoyanlar da var idi. Hamısı ciddi rəqibdir. Hansı haqda düşünmüşəm desəm, doğru olmaz. Hansı rəqib olur olsun, həmin oyuna çox ciddi hazırlaşacağıq. Layiqli oynamaq istəyəcəyik.
-Matçdan sonra telefonla danışırdınız. İlk təbriki kimdən aldınız?
-Zaqatalanın İcra Hakimi idi. Çox böyük azarkeşdir. Hər oyundan sonra ən birinci zəng edənlərdəndir. Hətta birincisidir.
-"Rakov"la oyundan sonra çoxlu tənqidlər oldu. Komandanı tərk edən oyunçular oldu. Bu mövsüm çəkdiyiniz çətinlikləri bilmək istəyərdik...
-Bunlar mənə bir o qədər çətin olmur. Çünki olayların içində oluram. Bəzən görürəm, kollektivdə hansı çatışmazlıqlar var və onları necə aradan qaldıra biləcəyimizi düşünürük. Kollektivə güvəniriksə, inamlı oluruq ki, bunu aradan qaldıra bilərik. Hər il tənqid olub. Tənqid olmayan ilimiz olmayıb. Normaldır. Futbolun ümumi gedişatı belədir. Azarkeş tənqid edər, media tənqid edər, bəlkə rəhbərlik edər, bəlkə bilmədiyimiz, düşünmədiyimiz insanlar... Amma bəzən hər ana real baxmaq lazımdır. Çətinlik və çatışmazlıqlardan narahat idik. Birdən-birə əsas oyunçuların komandadan getməsi, bəzi oyunçuların idman formasının aşağı olması...Bu onlardan asılı deyildi. Çatışmazlıq var idi. "Rakov"a uduzsaq belə, oyun baxımından ciddi problemlərimiz olmadı. Sadəcə keyfiyyət çatışmırdı. Bu da sağlam futbolçuların çox olmaması idi. Gedişatlara hazır olmalıyıq. Komandama güvənirdim. Çünki komandada elə oyunçular var ki, kimisi 3, kimisi 10 oyundan sonra daha yaxşı səviyyəyə yüksələcək. Kimsə tənqid edəndə əsəbiləşirik, narazılıq edirik. İnsanıq. Amma inanın ki, heç kimdən incimirəm. Azərbaycanlılarımdan incimərəm. Hamınızı çox istəyirəm. Tənqidin o an təsiri ola bilər, amma sizi başa düşə-düşə daha da məsuliyyətli çalışmağa, keyfiyyətli işləməyə başlayırıq. Bəlkə də, sizlərə, azarkeşlərə qarşı olan fikirlərimizdir ki, Allah bizə belə zəfər qismət etdi. Qruplarda oynayırıq, pley-off mərhələsinə çıxırıq. Bu bir klubun ayaqda durması, stabil qalması üçün çox yaxşı nəticədir. Klub, futbolçular, biz hamımız belə böyüməliyik. Çətinliklər olmasa, işləməyə, yaşamağa nə var ki?!
-Marko Veşoviç qırmızı vərəqə ilə cəzalandırıldı. Onun yoxluğunu necə kompensasya edəcəksiz?
-Vaxtımız var hələ. O müddətə kimi bilmirik, heyətdə durum necə olacaq, rəqib kim düşəcək, futbolçularımın ümumi hazırlığı hansı səviyyədə olacaq. Marko Veşoviç əvvəlki matçlarda zədəli olanda Mateusu, Toralı oynatmışıq. Ciddi problem görmürəm. Amma istəyirəm ki, həmişə belə futbolçular meydanda olsun. Veşoviç təcrübəlidi, əziyyət çəkənlərdəndir, məşqlərdə intizamı qoruyub-saxlayır. Onların belə böyük oyunlarda olmasını istəyirəm. Olmasa, digər variantlardan istifadə edəcəyik.
-Konfrans Liqasında pley-off mərhələsinə çıxdıqdan sonra aparıcı oyunçuları itirdiz. Bu mövsüm isə Avropa Liqasından pley-off mərhələsinə çıxdız. Bu sizi narahat etmir ki, birdən, heyəti qoruyub-saxlaya bilməzsiz?
-Maraqlı sualdır. Bəli, belə uğurlar olanda, oyunçulara təkliflər olur. Böyük oyunlarda futbolçunun potensialını daha düzgün izləyə bilirlər. Bəzi oyunçularımızla maraqlananlar var. Biz daim istəmişik ki, oyunçularımızı qoruyub-saxlayaq. Amma bəzən bizdən asılı olmayan səbəblər olur, yox deyə bilmirik. Komandadan gedən oyunçulardan sonra kollektivdə oyunçu azaldı. Amma klub olaraq, biz başqa sahədə udduq. Avropa bazarına çıxdıq. "Qarabağ"la daha fərqli maraqlanmağa başladılar. Tək nəticələrə görə yox, klub olaraq, oyunçuların burada potensialının yaxşılaşması yönündə. Bəzən oyunçular gəlir, burada potensialını açırlar. Bu bazara çıxdıq. Amma bu gün də, maraqlı, böyük təklif olsa, biz buna baxarıq. Başqa variantlara da əl atarıq. Hər bir halda, bu futbolçular bunu haqq ediblərsə, sona qədər bizimlə olsunlar. Minimum turnirin sonuna qədər. Lakin bu da bizim əlavə enerji itirməyimiz olacaq. Təklif olarsa, təbii ki. Deyə də bilmirik ki, olsun ya olmasın. Təkliflər olarsa, dərindən düşünəcəyik.
-Marko Veşoviç qırmızı vərəqə almamışdan qabaq sanki onu əvəzləməyi düşünürdüz?
-Qırmızı almamışdan əvvəl, hə. Sarı alanda, dəyişməyi fikirləşdim. Çünki narahat oldum ki, ikinci sarı alar. Amma hakim imkan vermədi, qırmızı vərəqə göstərdi (gülür).
-Kadi Borgesin yenidən "Qarabağ"a qayıdışı baş tuta bilər?
-Bizim onunla heç bir danışığımız olmayıb. Buradan gedən futbolçuların hamısına demişik ki, "Qarabağ"ın qapısı üzünüzə həmişə açıqdır. Deyim ki, inşallah geri qayıdar, düz çıxmaz. O daha da böyümək üçün qarşısına məqsəd qoyub. "Qarabağ"da hər şey onun üçün yaxşı idi. Belə variant olsa, biz yox demərik. Amma hazırda müqaviləsi var, özü də böyük. Gələcək göstərər.
-Qırmızı vərəqə aldıqdan sonra komanda müdafiəyə oturdu. "Hakken"in təzyiqindən irəli gəlirdi?
-Müdafiədə olsaq da, yaxşı əks-hücumlarımız oldu. Rəqib bizi müdafiə olunmağa məcbur etdi. Belə oyunlarda, belə halların olması məni sevindirir. Son vaxtlarda futbolçularda elə fikirlər oyanıb ki, daha çox hücumda oynamalıyıq. Amma tələblərimizdən biri odur ki, hücumda ola-ola müdafiə olunaq. Bu səviyyədə olan oyunlarda, azlıqda qalanda, futbolçu düzgün müdafiə olunursa, bu böyük futbolun vacib hissələrindəndir. Qarşımızda elə rəqib yoxdur ki, 90 dəqiqə hücumda olaq. Nəticə üçün çox önəmli amillərdəndir.
-Musa Qurbanlı da yəqin ki, çox sevinir. Sizcə, o, təəssüf hissi keçirir ki, kaş "Qarabağ"da qalardı, bu sevinci sizlə birlikdə bölüşərdi?
-Musa bir az fərqli xarakterli futbolçudur, insandır. O, legioner həyatını daha çox sevir. Məqsədi var ki, daim xaricdə olsun. Fərqi yoxdur, hansı liqadır, ən azından orta liqalardan birində. Onu bugünkü gün bu qane edir. İnanmıram ki, heyfslənsin. Əksinə, mənim və "Qarabağ"ın uğuruna çox sevinir. Əgər belə fikir onda olsa, irəli gedə bilməz. Sanki onun üçün hər şey bitər. Məqsədlərinin qarşısını kəsmiş olar.
-Qurban Qurbanov olmasaydı, Azərbaycan futbolu nə edərdi?
-Siz məni ağır yükün altına saldınız. Çox sağ olun belə dəyərə görə. İnanıram ki, məni tanıdığınıza görə, özüm haqda cavab verə bilməyəcəyimi də bilirsiz. Mən futbolda, ya başqa sahədə olum, fərqi yoxdur. Əgər ölkənin övladıyıqsa, işimizdə məsuliyyətli olmalıyıq. Başqa sahədə də olsaydım, yenə məsuliyyətli işləyəcəkdim.
-"Hakken"in heyətində elə futbolçu oldu ki, sizə maraqlı gəlsin?
Bir neçə oyunçu oldu, amma adlarını deməyəcəm. Hətta ilk oyundan sonra oldu.
-Oyundan sonra Juninyo qələbə sevincini sizinlə bölüşdü. Bu sevgini necə qazanırsız?
-Biz bir ailəyik. Hər birini çox istəyirəm. İnsan get-gedə birini, keçmişini, hansı yollardan keçdiyini, necə böyüdüyünü bildikcə, xatırladıqca, istər-istəməz onlara daha həssas yanaşır. Çünki Juninyo tam fərqli xarakterlidir. Bərk idmançı xarakteri var. Bu hələ onun potensialı deyil. Bəzi söhbətimiz olub onunla. Fərqli mentalitetdəydi, fərqli futbol oynayırdı. Çempion adı hər idmançı üçün çox vacibdir. O adı qazanmırsa, böyümür. Belə turnirlərdə, bu cür oyunlar oynayıb, digər mərhələ adlamırsa, futbolçu özünü böyük oyunçu saymır. Juninyo Portuqaliyada oynayılb, böyük klublarla qarşılaşıb. Amma buradakı məsuliyyət onda heç vaxt olmaytıb. Ondan onu həmişə tələb edirdim. Get-gedə məni daha anlamağa başlayıb, futbola sevgisi artıb. Maraqlı söhbətlərimiz olur. Danışırıq, bəzən zarafat edirik. O da görür ki, biz çox məsuliyyətli klubuq. Bəlkə düşünmədiyi futbol haqda burada fikirləri oyanıb. Məndən daha çox yaranıb. Yəqin mənə qarşı ona görə fərqlidir. Mən özüm də bərk futbolçuları xoşlayıram. Ondan hələ çox şey tələb edəcəyik.
-Sizin özünüzü nə motivasiya edir?
-Bəzən hər bir sahədə düstur axtarırsan ki, onu nə cür yaxşılaşdıra bilərsən. Ən düzü sadəsini axtarıb tapmaqdır. Dəfələrlə demişəm ki, özümün tələbim odur ki, nə olursa-olsun işimdə məsuliyyətli olmalıyam. Əgər biz bu vətənin övladlarıyıqsa, işimizdə məsuliyyətli olacağıqsa, nəticə gələcək. Bunu düşünərək işə gedirəm, oyunlara çıxıram, futbolçularımdan tələb edirəm, oyunlara hazırlayıram. Sadəcə bu yolu tutmuşam və onu düşünərək addım atıram.
-Xarici kluba gedə bilərsiz? Oyunçuları istəyirlərsə, sizi də istəyənlərin olması mümkündür...
-Bilmirəm. Nə vaxtsa, onsuz da olmayacağıq. Bilmirik sabah başımıza nə iş gələcək. Amma hansısa kluba getmək barədə bu gün düşünmürəm. Bu kluba çox bağlı insanam. Nə qədər ki, bu klub var, nə qədər ki, Qarabağ adı var, çox istəyərm burada qalım, nəticə əldə edim. Dəyişikliklər ən böyük klublarda belə, olub. Bəzən rəhbərlik klubu buraxır gedir, bəzən maddi olaraq səviyyə aşağı düşür. Hələ ki, "Qarabağ"dan getməyi düşünmürəm. Nəsə böyük bir şey olmasa, hələ ki, buradayam.
-Ardıcıl üçüncü dəfə pley-off mərhələsində oynayacaqsız. Bu dəfə yanaşma cəhətdən nə önəmli olacaq?
-Məncə, təcrübə böyük rol oynayacaq. Bu gün futbolçularımın təcrübəsi az deyil. "Bayer"lə oyun bizə futbolda çox şey verdi. O səviyyədə olan komandaların gücünü hiss etdik. Hansı rəqib olursa-olsun, ola bilər ki, rəqibi daha çox analiz edək. Yanvardan çempionatımız başlayacaq. Ola bilər ki, hazırlığımızda da bəzi dəyişikliklər edək ki, o vaxta pik nöqtəyə çıxaq. Rəqibdən çox şey asılıdır. Elə olur ki, nə qədər hazır olsaq da, rəqib bizi üstələyir. Az təcrübə toplamamışıq. Bu il bəzi oyunlarımız oldu ki, daha böyük matçlarda oynamaq üçün fürsət əldə etdik.
-Anton Krivotsyukla maraqlanmısız?
-Xeyr, danışığımız olmayıb.
Oxşar xəbərlər
Ana səhifə
Bütün xəbərlər
Hesabım