“Qarabağ”ın baş məşqçisi Qurban Qurbanova ədalətli oyun prinsiplərinə görə verilən ən nüfuzlu idman mükafatı “Jean Borotra World Fair Play Career” ilə təqdim olunub. 

Apasport.az saytı xəbər verir ki, o, mükafatı Beynəlxalq Feyr-Pley Komitəsinin (CİFP) Macarıstanın paytaxtı Budapeştdə təşkil olunan təqdimetmə mərasimində alıb.

“Qarabağ”ın baş məşqçisi karyerası ərzində ədalətli oyun prinsiplərinə sadiqliyinə görə verilən bu mükafata layiq görülən ilk azərbaycanlı kimi tarixə düşüb. Qurbanovun CİFP-in “Jean Borotra World Fair Play Career” və “Pierre de Coubertin World Trophy” mükafatlarına təqdimatı Azərbaycan İdman Jurnalistləri Assosiasiyasının (AİJA) tərəfindən gerçəkləşib. Komitə onun bir dəfə deyil, karyerası boyu ədalətli oyun prinsiplərinə sadiq qalmasını nəzərə alıb və Qurbanovu daha nüfuzlu “Jean Borotra World Fair Play Career” mükafatına layiq görüb.

Qeyd edək ki, Qurbanov UEFA Avropa Konfrans Liqasının 2022-ci ildə keçirilən pley-off mərhələsinin “Qarabağ” – “Marsel” matçında İbrahima Vadjinin əllə vurduğu qolu ləğv etdirib. 
 

• Elmar Baxşıyev: “Nəticə rahat oynamağa imkan verirdi”
• "Sevilya" belçikalı qolkiperi heyətinə qatmaq istəyir
• "Arsenal" 2015-ci ildən bəri "Bavariya"nı məğlub edə bilmir
• Ronaldu erkən əvəzlənməsindən narazıdır
• "Azərreyl" baş məşqçisi ilə müqavilə yenilədi