Bedri Meriç: "Şəki"ni bu mövsüm pley-offlarda görəcəyik"

18.10.2024 - 12:32

'Şəki" basketbol klubunun türkiyəli baş məşqçisi Bedri Meriç klubun mətbuat xidmətinə müsahibə verib.

Apasport.az müsahibəni təqdim edir:

- Ötən mövsüm "Gəncə" komandasını çalışdırırdınız. Yeni mövsümdən "Şəki"ni çalışdırırsınız. Bu haqda nə deyə bilərsiniz?
- "Gəncə" ilə gözəl mövsüm keçirdim. Heyətdə oyunçu çatışmazlığı üzündən, pley-offa düşə bilmədik. "Şəki"ni də ötən mövsümdən tanıyıram. Yeganə qalib gəldikləri matç bizimlə keçirdikləri 2-ci oyun olmuşdu. Həmin məğlubiyyət bizim pley-off şansımızı itirdiyimiz vaxta təsadüf etdi. Amerikalı basketbolçular üçün motivasiya itmişdi deyə, bizim üçün mövsüm sanki başa çatmışdı. Şəkiyə gəldiyimdə də buranı şəhər olaraq sevmişdim. Burada özümüzü rahat hiss edə biləcəyimiz şərait – Olimpiya İdman Kompleksi var. Bir də ki basketbolda şəhərlər çox önəmli deyil. Biz peşəkarıq. Ona görə də işlədiyim yerin Şəki və ya Gəncə olmasının əhəmiyyəti yoxdur. Mən sadəcə işimi görürəm.

- Bu mövsüm çempionatda limit dəyişikliyi edildi. İndi artıq daha çox legioner oynatmaq imkanı olacaq. Bu, çempionatın səviyyəsini nə dərəcədə qaldıracaq?
- Çempionatın səviyyəsi qalxacaq. Əvvəla ona görə ki, çempionatda komanda sayı 10-dan 12-yə yüksəldildi. Biz B qrupunda mübarizə aparacağıq. 4+1 sistemi ilə yeni mövsümdə daha səviyyəli legionerlərin klublarda çıxış edəcəyini, daha səviyyəli oyunların baş tutacağını düşünürəm. Məncə, ötən mövsümkü oyunlardakı kimi böyük top fərqli qələbələr olmayacaq. Yerli oyunçular da 1 nəfərlik start heyətə düşmək üçün çalışacaq və özlərini təkmilləşdirmək üçün yaxşı şansları olacağını düşünürəm.

- "Şəki" çempionata "Quba" ilə oyunla start verəcək. Ötən mövsüm "Cəlilabad" adı ilə çıxış etmiş bu komanda haqqında nə deyə bilərsiniz?
- Bəli, "Quba" komandasını tanıyıram. Baş məşqçi Şəhriyar Əsgərov və onun köməkçisi Zaur Paşayev oradadır. Zaur haqda danışmağa gərək yoxdur. Azərbaycan millisinə xidmətləri dəymiş, çempionatın ən yaxşı yerli oyunçularından, "guard" mövqeyində çıxış edən biridir. 4 legioner oyunçu transfer etdiklərini bilirəm. Onların içərisində tanıdığım amerikanlar da var. Güclü komandadır, hazırlıq oyunları ilə daha da yaxşı duruma gəldiklərini düşünürəm. Çətin matçla çempionata başlayacağıq.

- "Quba" 4 yoxlama oyunu keçirdi, 3 məğlubiyyət və 1 heç-heçə etdi. Bəs "Şəki" niyə yoxlama matçı keçirmədi?
- Açığı, bizim bir az vaxta ehtiyacımız var. Bizim əcnəbi oyunçular düşərgəyə gec qoşuldu, zədə problemlərimiz oldu, bu səbəbdən də transferlərimizin bəzisi gec alındı. Tam heyətlə bir araya gəlməyimiz gec alındığından, təəssüf ki, yoxlama matçları keçirə bilmədik. Bu bizim üçün mənfi cəhətdir. Ancaq 1-2 matça komandanın çox yaxşı ritmə düşəcəyini düşünürəm.

- Klub olaraq 8 transferin edildiyini rəsmi olaraq açıqlamışıq. Əcnəbi və yerli oyunçuların səviyyəsi sizi qane edirmi?
- Yerli oyunçu kimi Türkiyədən Ərcan Donatı transfer etdik. O da Azərbaycan millisinin üzvüdür. Ərcanın bizim komandanı gücləndirəcəyini düşünürəm. Eyni zamanda Azərbaycan millisinin aşağı yaş qrupu üzrə komandalarında çıxış edən oyunçularımız var. Şəkidən olan yerli oyunçularımız da komandada qalır. Hamısından faydalanmağa çalışacağıq. Əcnəbilərə gəlincə, ötən mövsümdən komandada olan nigeriyalı oyunçular bizimlə qalır. Onlardan başqa, 5 yeni əcnəbi transfer etdik. Yeni legionerlərimiz həqiqətən səviyyəli oyunçulardır. Onlar səviyyələri ilə çempionatda öz sözlərini deyəcəklər. Yetər ki, onlara dəstəyimizi davam etdirək. Əminəm ki, gündən-günə daha yaxşı durumda olacaq komanda yaradacağıq. "Şəki"ni bu mövsüm pley-offlarda görəcəyik.