Avropa Liqasının “Ayntraxt”la “Reyncers” arasında final oyunu bir sıra maraqlı məqamlarla əlamətdar olub.

Apasport.az saytı qarşılaşmanın maraqlı faktlarını təqdim edir.

⚽  25 ildən sonra Avropa Liqasında (əvvəlki UEFA kuboku) Almaniya klubu kubok qazanıb. Sonuncu dəfə buna 1996/97 mövsümündə “Şalke” nail olub.

⚽  “Ayntraxt” mövsümdə keçirdiyi 13 oyunun hamısında qol vurub. 2009-cu ildən indiki formatda keçirilən turnirdə bunadək yalnız “Çelsi” 2018/19 mövsümündə bütün matçlarda qol sevinci yaşayıb.

⚽  Çempionlar Liqasına (əvvəlki Çempionlar kuboku) vəsiqə qazanan “Ayntraxt” sonuncu dəfə 1960-cı ildə qitənin ən nüfuzlu klub turnirində oynayıb. Almaniyalılar bu yarışa 62 ildən sonra qayıtmaqla ən uzun həsrətə son qoyub.

⚽  “Ayntraxt”ın baş məşqçisi Oliver Qlasner karyerasında ilk titulu qazanıb.

⚽  Oliver Qlasner 1983-cü ildən sonra avrokubokların qalibi olan ilk avstriyalı baş məşqçidir. 39 il əvvəl Ernst Happel “Hamburq”la Çempionlar kubokunu əldə edib.

⚽  “Reyncers”in qoluna imza atan Co Aribo avrokubokların finalında qol vuran ikinci nigeriyalıdır. 2019-cu ildə Bakıdakı “Arsenal” – “Çelsi” qarşılaşmasında Aleks İvobi fərqlənmişdi.

⚽  Avropa Liqası (əvvəlki UEFA kuboku) tarixində ilk dəfə ardıcıl iki mövsümün finalı penaltilər seriyası ilə nəticələnib. Ötən il “Vilyarreal” “Mançester Yunayted”ə seriyada 11:10 hesabı ilə qalib gəlib.

⚽  “Reyncers”in oyunçusu Ceyms Taverniyer 7 qolla Avropa Liqasının bombardiri olub. O, 1993/94 mövsümündə “Barselona” ilə Çempionlar Liqasında mövsümün bombardiri olan Ronald Kumandan sonra bunu bacaran ilk müdafiəçidir. 

Qeyd edək ki, Almaniya klubu 1:1 hesabı ilə başa çatan görüşdə penaltilərlə qalib gəlib – 5:4.
 

• “Qəbələ” qalib gəldi, “Neftçi” xal itirdi
• "Bavariya"dan yeni müqavilələr
• Azərbaycanlı mütəxəssis beynəlxalq tədbirdə iştirak edib
• Amorimin “Yunayted”dən ilk istəyi – Xviça Kvaratsxeliya
• Xorvatiya Albaniya matçında qalib müəyyənləşmədi - YENİLƏNİB