Bernard Lippert “Şaxtyor”da oynayan azərbaycanlı futbolçuları izləmək məqsədilə Ukraynaya yollanacaq

23.04.2008 - 18:59

Bakı. Mehman Süleymanov – APA-Sport. Azərbaycanın 21 və 17 yaşlılardan ibarət yığma komandasının baş məşqçisi Bernard Lippert gələn həftə Ukraynaya yollanacaq. “APA-Sport” agentliyinin məlumatına görə, 46 yaşlı almaniyalı mütəxəssisin səfərində məqsəd Donetskin “Şaxtyor” klubunun nəzdində yer alan komandalarda oynayan azərbaycanlı futbolçuların hazırlıq durumu ilə tanış olmaqdır. B. Lippert bundan sonra onların yığmaya cəlb olunması ilə bağlı qərarını verəcək. 21 yaşlılardan ibarət yığmanı iyunun sonunda bir araya gətirməyi planlaşdıran B. Lippert rəhbərlik etdiyi digər yığma ilə hazırlıqlara daha tez başlayacaq. Belə ki, 17 yaşlıların mayın ortalarında ölkə daxilində təlim-məşq toplanışının keçirilməsi nəzərdə tutulub. Almaniyalı mütəxəssisin nəzarət etdiyi 19 yaşlılardan ibarət yığmamız isə gələn ay Özbəkistana yollanacaq. Yaşar Vahabzadənin baş məşqçisi olduğu komanda mayın 29-da orada startı veriləcək turnirə qatılacaq. Qeyd edək ki, 19 və 17 yaşlılardan ibarət yığmalarla Almaniyada keçirilən təlim-məşq toplanışından razı qalan B. Lippert bu ölkənin “Ayntraxt” klubu ilə əməkdaşlıq etmək istəyindədir. Səfərdən qayıdan alman mütəxəssis AFFA-nın rəsmi saytına müsahibəsində 12 il çalışdığı bu klubla yaxşı əlaqələrindən səmərəli istifadə etmək fikrində olduğunu bildirib: “Bu klubdan əməkdaşlıqla bağlı təklif almışam. Perspektivli oyunçularımızın bu kluba gedib, püxtələşməsini istəyirəm. Həmyerlilərim yalnız futbolla bağlı deyil, infrastrukturun qurulması sahəsində də AFFA ilə əməkdaşlığa hazırdırlar. Əsas problem Avropa Birliyi üzvü olmayan ölkələrin vətəndaşlarının Almaniyadakı uşaq futbol komandalarında oynamasına icazə verilməməyidir. Bunun üçün gərək Almaniya Futbol İttifaqından (AFİ) xüsusi icazə alaq”. Alman menecerlərin 5-6 yeniyetmə futbolçumuzla maraqlandığını deyən B. Lippert razılaşma əldə olunana qədər onların açıqlamayacaq.