Bakı. Aqşin Əliyev - APA-Sport. Futbol üzrə Azərbaycan milli komandasının baş məşqçisi Berti Foqtsa yeni müştəri tapılıb. “APA-Sport”un məlumatına görə, 62 yaşlı çalışdırıcı ilə Almaniyanın beşqat çempionu Münhenqladbax “Borussiya”sının rəhbərliyi maraqlanır.

Cari mövsümdə komandanın uğursuz çıxışı “Borussiya” rəsmilərini təngə gətirib. Bundesliqanın arxada qalan 7 turunda cəmi 3 xal toplayan Münhenqladbax təmsilçisi yarış cədvəlinin sonuncu, 18-ci pilləsində qərarlaşıb. Vəziyyət dözülməz həddə çatdığından rəhbərlik bir neçə gün əvvəl baş məşqçi Yos Lukayı istefaya göndərib. Yeni baş məşqçi tapılanadək kollektivə idman direktoru, Almaniya yığmasının sabiq yarımmüdafiəçisi Kristian Tsiqe rəhbərlik edəcək.

Boş qalmış baş məşqçi postuna isə 9 namizəd var - Mattias Zammer, Berti Foqts, Hans Meyer, Folker Finke, Mirko Slomka, Falko Qots, Klaus Augentaler, Markus Şupp və Vinfrid Şefer. “Borussiya” ilə anlaşmağa Zammerin daha yaxın olduğu bildirilir. Bununla belə, münhenqladbaxlılar Almaniyanın ən məşhur məşqçilərindən biri, bu ölkənin milli komandasına 1996-cı ildə Avropa çempionu titulunu qazandırmış Foqtsun da namizədliyini nəzərdən keçirirlər.

• “Roma”da yeni müqavilə
• Ruslan Qurbanov: "Futbolda oynaya bilməyəcəyimiz rəqib yoxdur"
• Yon Dal Tomasson: "2-3 futbolçunun fiziki durumu ilə bağlı problemi var"
• "Sumqayıt"ın sabiq baş məşqçisi komandasından ayrılıb
• Premyer Liqa klubunun futbolçusu irqçilikdə günahlandırılıb