“Neftçi”nin sabiq futbolçusu Roman Bask apasport.az saytına müsahibə verib. Hazırda Fransada "Versal" klubunda oynayan yarımmüdafiəçi Azərbaycandan ayrılmasına aydınlıq gətirib.
- Hazırda karyeran necə gedir? Hər şey səni razı salır?
- Karyeram çox yaxşı gedir. Mən ailəmə yaxın, əla infrastruktura malik klubda oynayıram. İstədiyim də elə budur. Öz oyunumu yenidən tapdım və hər şeydən önəmlisi odur ki, əylənirəm.
- Vaxtında böyük ümidlərlə “Neftçi”yə transfer olunmuşdun. Amma bu klubda qalası olmadın. Səbəb yalnız ailə problemləri idi?
- Bəli, elədir ki, var. Bunu bir neçə dəfə demişəm, yenə təkrar edirəm. Yeni doğulan qızım üçün Fransaya qayıtmalı idim. O, isə mənim ilk övladım idi. Onu cəmi 3 gün görmüşdüm, sonra uzun müddət görmədim. Mən dekabrda qayıdanda isə artıq üç ay keçmişdi və o çox böyümüşdü. Bütün bunlara görə geri qayıtmağı seçdim. Başqa heç bir problem yox idi.
- “Neftçi”də qalmadığın üçün peşmansan? Hər halda, qala bilərdin...
- “Neftçi”də bütün keyfiyyətlərimi, nəyə qadir olduğumu göstərməməyimdən məyus oldum. “Neftçi” mənim ölkə xaricindəki ilk klubum idi. Bu, hələ də elə olaraq qalır. Azərbaycana qayıtmalı olsam, prioritetim “Neftçi”dir.
- Maraqlıdır, sonradan “Neftçi”yə qayıtmaq imkanın var idi, yoxsa bir daha belə təklif almadın?
- Xeyr, “Neftçi”dən ayrıldıqdan sonra heç vaxt təklif almamışam. Amma dönüş haqda menecerimlə danışmalıyam. Görək, o nə deyir.
- Bildiyimə görə, “Zirə”dən təklif almısan. Doğrudurmu? Niyə ora getmədin?
- Xeyr, “Zirə” ilə danışıq aparmamışdım. Hətta yayda klubsuz qalanda belə. Klub mənimlə danışıq aparmamışdı.
- “Neftçi”də çıxış edəndə baş məşqçi Samir Abasov idi. Hələ də onunla danışırsan? Hazırda “Sumqayıt”ın baş məşqçisidir. Heç “Sumqayıt”a dəvət almısınız?
- Samir Abasovla çox yaxşı əlaqəmiz var. Mənim getməyim onun günahı deyil. Onun əvvəl və indiki klubu ilə gördüyü işlərə baxın. Buna görə də onu təbrik etmək istəyirəm. Onunla münasibətimiz yaxşıdır.
- “Neftçi”də çıxış edəndə, komanda Çempionlar Liqası, Avropa Liqası və Konfrans Liqasının təsnifat mərhələsində iştirak etdi. Amma heç bir turnirdə qrup mərhələsinə vəsiqə qazana bilmədi…
- Komanda qurulur, hər gün yeni oyunçu gəlir. “Olimpiakos”a qarşı oynamaq asan deyildi. İki dəfə uduzduq. Futbol elədir ki, sadəcə həmin il üzümüzə gülmədi.
- “Neftçi”də hansı oyunu daha çox xatırlayırsan? Hansı qarşılaşma sənin üçün unudulmaz oldu?
- Azərbaycan çempionatında çətin olan bir rəqiblə ildə 4 dəfə oynamaqdır. “Neftçi” böyük klubdur və hər komanda “Neftçi”ni məğlub etmək istəyir, hər oyunda 100 faiz hazır olmalısan, əks halda çətindir. “Neftçi” ilə ən yaxşı xatirəm Avropa oyunlarıdır.
- Hazırda Azərbaycanda çıxış edən futbolçular arasında vaxtilə Fransa liqasında iştirak edənlər də var. Onları tanıyırsan? Onlarla münasibətin varmı?
- Mən artıq Fransa çempionatında Yasin Benzia, Adama Diakabi, Ervin Koffi və Kasimir Ninqa kimi oyunçularla qarşılaşmışam. Lakin bu günə kimi onlarla əlaqəm olmayıb. Amma Azərbaycan çempionatını izləyirəm.
Oxşar xəbərlər
Ana səhifə
Bütün xəbərlər
Hesabım