Bakıda keçirilən taekvondo üzrə dünya çempionatında daha 3 çəki dərəcəsində qaliblər müəyyənləşib. 

Apasport.az saytının məlumatına görə, qadın taekvondoçuların 49 kq çəki dərəcəsində fəxri kürsünün ən yüksək pilləsinə Merve Dincel (Türkiyə) qalxıb. O, finalda Panipak Vongpattanakiti (Tailand) məğlub edərək, dünya çempionu tituluna yiyələnib. 3-cü yeri Bruna Duvançiçi (Xorvatiya) və Adriana Serezo İqlesias (İspaniya) tutublar. 

Kişilər arasında 80 kq çəki dərəcəsində finalda Simone Alessio (İtaliya) Karl Alan Nikolasla (ABŞ) üz-üzə gəliblər. İtaliyalı taekvondoçu qalib gələrək qızıl medala yiyələnib. Nikolas ikinci yerdə qərarlaşdığı halda, Seif Eyissa (Misir) ilə Migel Treyos (Kolumbiya) bürünc medala layiq görülüblər. 

87 kq-da mundialın ən güclüsü Çanqhyun Kanq (Cənubi Koreya) olub. Gümüş medalı İvan Sapina (Xorvatiya), bürünc mükafatları Artyom Plonis (Dünya Taekvondosu) və Arian Salimi (İran) qazanıb. 

Bu çəki dərəcələrində Azərbaycan millisinin idmançılarından Əliəskər Əliyev (80 kq), Taleh Süleymanov (87 kq) və Patimat Abakarova (49 kq) 1/8 finalda mübarizəni dayandırıblar. 

Qeyd edək ki, yarışın dördüncü günündə daha 2 çəki dərəcəsində qaliblər müəyyənləşəcək. 

• Qələbə kuponu
• Üç əmsallıq KUPON
• Lamin Yamal AVRO tarixinə düşdü
• Britaniyalı sürücü sərbəst yürüşdə qəza törədib
• Ronaldo yeganə təklifi rədd etdi