Bakı. Aqşin Əliyev - APA-Sport. Bakıda 19 yaşadək qızlardan ibarət futbol yığmaları arasında təşkil olunan Avropa çempionatının ilkin seçmə mərhələsinin 6-cı qrupunda ikinci turun oyunları başa çatıb. “APA-Sport”un məlumatına görə, bu gün yarışda iki matç gerçəkləşib.

Öncə Zabrat qəsəbə stadionunda Çexiya və Şimali İrlandiya yığmaları üz-üzə gəliblər. Rəqibə nisbətən üstün oyun nümayiş etdirən çexiyalılar 2:1 hesablı qələbə qazanıblar. Daha sonra Tofiq Bəhramov adına Respublika stadionunda Azərbaycan milli komandası Finlandiyanı sınağa çəkib. Gərgin və maraqlı idman mübarizəsi şəraitində keçən qarşılaşma Şamil Heydərovun yetirmələrinin qələbəsi ilə nəticələnib - 1:0.

Beləliklə, iki matçda maksimum nəticə göstərən yığmamız vaxtından əvvəl növbəti mərhələyə vəsiqəni təmin edib. Sentyabrın 30-da Şimali İrlandiyaya qarşı keçiriləcək oyun xanım futbolçularımız üçün formal xarakter daşıyacaq.

Qeyd edək ki, milli komandamız birinci turda Çexiyanı 2:1 hesabı ilə məğlub etmişdi. Reqlamentə əsasən, qruplarda ilk iki yeri tutan kollektivlər, eləcə də ən yaxşı göstəricilərlə 3-cü pillədə qərarlaşan 1 yığma növbəti mərhələdə iştirak hüququ qazanır.

	Komanda	O	Q	H	M	T	X
1	Azərbaycan	2	2	0	0	3-1	6
2	Çexiya	2	1	0	1	3-3	3
3	Finlandiya	2	1	0	1	1-1	3
4	Şimali İrlandiya	2	0	0	2	1-3	0

• Türkiyə millisinin üzvü Premyer Liqa yolunda
• Fransa millisində rekord
• Vüqar Nadirov bölgə klubunda - Rəsmi
• Didye Deşam: "İtaliya millisi son oyunlarda yaxşı formada idi"
• "İnter" 35 milyon avroya yeni müdafiəçi tapıb